ភាគពាយព្យនៃសហរដ្ឋអាមេរិក បានជៀសផុតពីការរងការវាយប្រហារដ៏ខ្លាងក្លាពី "ព្យុះស៊ីក្លូន បម" (Bomb cyclone) ទីពីរកាលពីថ្ងៃព្រហស្បតិ៍ (២១ វិច្ឆិកា) នៅពេលដែលឥទ្ធិពលរបស់ព្យុះបានកើតឡើងតិចជាងការព្យាករ ប៉ុន្តែ "កំសួលសំណើមបរិយាកាស" ដែលកំពុងបន្ត បានវាយប្រហារភាគខាងជើងរដ្ឋកាលីហ្វ័រនីញ៉ា (California) ជាមួយនឹងខ្យល់ និងភ្លៀងធ្លាក់ ដែលបង្កការជន់លិចយ៉ាងខ្លាំង។

ព្យុះស៊ីក្លូន Bomb ទីមួយ ដែលធ្លាក់សម្ពាធយ៉ាងឆាប់រហ័ស បានបង្កើតឱ្យមានខ្យល់បក់ និងភ្លៀងធ្លាក់ខ្លាំងដូចកម្លាំងព្យុះសង្ឈរា ដោយវាយលុកតំបន់នេះកាលពីថ្ងៃចន្ទ និងអង្គារ សម្លាប់មនុស្ស ២នាក់ និងផ្តាច់ចរន្តអគ្កិសនីដល់មនុស្សរាប់សែននាក់ ចាប់ពីរដ្ឋ វ៉ាស៊ីនតោន ទៅកាន់ភាគខាងជើងនៃរដ្ឋ California។

អ្នកជំនាញឧតុនិយមនៅមជ្ឈមណ្ឌលព្យាករអាកាសធាតុជាតិ បានលើកឡើងថា ព្យុះស៊ីក្លូន Bomb ទីពីរត្រូវបានគេព្យាករថា នឹងវាយប្រហារនៅថ្ងៃព្រហស្បតិ៍ ប៉ុន្តែសម្ពាធរបស់ព្យុះនេះមិនបានធ្លាក់លឿនគ្រប់គ្រាន់ក្នុងពេល ២៤ម៉ោង ដើម្បីកំណត់គោលដៅច្បាស់ទេ ប៉ុន្តែទោះជាបែបនេះក្ដី ប្រព័ន្ធសម្ពាធទាបបានបង្កើតជាខ្យល់ និងភ្លៀងបន្ថែមទៀត។

ភាគខាងជើងរដ្ឋ California បានបន្តជន់លិចពីកំសួលសំណើមបរិយាកាសនេះកាលពីថ្ងៃព្រហស្បតិ៍ ដែលបង្កគ្រោះថ្នាក់ដល់ផ្លូវថ្នល់ និងការជូនដំណឹងពីទឹកជំនន់ និងខ្យល់ខ្លាំង។ យ៉ាងណាមិញ ព្យុះនេះក៏បាននាំមកនូវទឹកភ្លៀងដែលត្រូវការយ៉ាងខ្លាំង ដោយសារភាគច្រើននៃភាគខាងជើង California បាននឹងកំពុងជួបប្រទះនូវស្ថានភាពស្ងួតហួតហែងខុសធម្មតា នេះបើយោងតាមក្រុមឃ្លាំមើលគ្រោះរាំងស្ងួតរបស់សហរដ្ឋអាមេរិក៕