រដ្ឋាភិបាលក្នុងតំបន់បាននិយាយកាលពីថ្ងៃព្រហស្បតិ៍ (២១ វិច្ឆិកា) ថា សំឡេងរំខានពីឧបករណ៍បំពងសំឡេងរបស់កូរ៉េខាងជើង បានធ្វើឱ្យអ្នកស្រុកនៅជិតព្រំដែនអន្តរកូរ៉េ រងទុក្ខជាច្រើនខែ ដោយអ្នកខ្លះត្អូញត្អែរថាសុខភាពរបស់ពួកគេមានបញ្ហាយ៉ាងខ្លាំង។

ទិន្នន័យពីការវាយតម្លៃសុខភាពផ្លូវចិត្តនាពេលថ្មីៗនេះនៅទីក្រុង គីមផូ (Gimpo) ខេត្ត គ្យឹងគី (Gyeonggi) បានបង្ហាញថា ២៨%នៃអ្នកឆ្លើយតប កំពុងជួបប្រទះបញ្ហាសុខភាពផ្លូវចិត្តខ្លាំង។ ការវាយតម្លៃនេះ ធ្វើឡើងដោយមជ្ឈមណ្ឌលសុខុមាលភាពសុខភាពផ្លូវចិត្តរបស់ទីក្រុង ចាប់ពីថ្ងៃទី០៨ ដល់ថ្ងៃទី១៤ ខែសីហា លើអ្នកស្រុកចំនួន ១០២នាក់ ដែលរស់នៅជិតព្រំដែនក្នុងតំបន់ វ៉ុលហ្កូ ម្យ៉ុន (Wolgot-myeon) និង ហាសឹង ម្យ៉ុន (Haseong-myeon)។

យោងតាមរបាយការណ៍ក្នុងស្រុកបានឱ្យដឹងថា ការចាក់ឧបករណ៍បំពងសំឡេង ដែលមានសំឡេងពិសេសដូចជាស៊ីរ៉ែន និងដែកទង្គិចគ្នា ត្រូវបានចាក់ឈប់ៗ ម្តងហើយម្តងទៀតនៅគ្រប់ម៉ោង ខណៈអ្នកស្រុក កាងវ៉ា ហ្កាន់ (Ganghwa-gun) នៅទីក្រុង អ៊ីនឆុន (Incheon) របស់កូរ៉េខាងត្បូង ក៏បានរងគ្រោះបែបនេះផងដែរ។

សំឡេងរំខាន ដែលបានរាយការណ៍ជាលើកដំបូងនៅចុងខែកក្កដា ហើយត្រូវបានពណ៌នាថាដូចសំឡេងដែកទង្គិចគ្នានេះ ក៏មានលាយសំឡេងស៊ីរ៉ែន និងស្គរ ហើយបន្តកើតមានជាញឹកញាប់។

មន្ត្រីទីក្រុងសេអ៊ូលជឿថា នោះអាចជាវិធានការសងសឹករបស់កូរ៉េខាងជើង ប្រឆាំងនឹងការបន្តចាក់ឡើងវិញនូវឧបករណ៍បំពងសំឡេងនៅដើមខែនោះ។ លើសពីនេះ វាក៏អាចជាយុទ្ធសាស្ត្រមួយដើម្បីរារាំងពលរដ្ឋកូរ៉េខាងជើង មិនឱ្យស្តាប់លឺការឃោសនារបស់កូរ៉េខាងត្បូង៕