អគ្គលេខាធិការសម្ព័ន្ធអារ៉ាប់ (AL) លោក អាម៉េដ អាបូល ហ្គេត (Ahmed Aboul-Gheit)កាលពីថ្ងៃព្រហស្បតិ៍ បានថ្កោលទោសសហរដ្ឋអាមេរិកចំពោះការវេតូលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) ដែលបានអំពាវនាវឲ្យមានបទឈប់បាញ់ និងការបញ្ចប់ការឈ្លានពានរបស់អ៊ីស្រាអែល នៅក្នុងតំបន់់ហ្កាហ្សាស្ទ្រីប។

លោក អាបូល ហ្គេត បាននិយាយនៅក្នុងសេចក្តីថ្លែងការណ៍មួយថា៖«ជំហររបស់សហរដ្ឋអាមេរិក ដែល ត្រូវបានទុកឲ្យនៅឯកោជាអន្តរជាតិ និងត្រូវបានថ្កោលទោសទាំងផ្នែកនយោបាយ និងសីលធម៌ គឺការផ្តល់ភ្លើងខៀវដល់អ៊ីស្រាអែល ដើម្បីបន្តយុទ្ធនាការបង្ហូរឈាមរបស់ខ្លួនប្រឆាំងនឹងជនស៊ីវិលប៉ាឡេស្ទីន នៅតំបន់ ហ្កាហ្សា ក្នុងនោះមានភាពស្រេកឃ្លាន និងការផ្លាស់ទីលំដោយបង្ខំ ដើម្បីលែងឲ្យមានអ្នកស្រុក រស់នៅក្នុងតំបន់ហ្កាហ្សាស្ទ្រីប»។

លោកបាននិយាយថា តាមរយៈការប្រើសិទ្ធិវេតូនេះ សហរដ្ឋអាមេរិកកំពុងលើកទឹកចិត្តកងកម្លាំងអ៊ីស្រា អែលឲ្យបន្តសង្រ្គាម នៅតំបន់ហ្កាហ្សា និងបង្កើនភាពអសមត្ថភាពរបស់អន្តរជាតិ ក្នុងការប្រឈមមុខនឹងជម្លោះក្នុងតំបន់ដ៏គ្រោះថ្នាក់បំផុត។

សហរដ្ឋអាមេរិកកាលពីថ្ងៃពុធ បានធ្វើការវេតូលើសេចក្តីព្រាងសេចក្តីសម្រេចរបស់ UNSC ដែលបានអំពាវនាវឲ្យមានបទឈប់បាញ់ជាបន្ទាន់ នៅក្នុងតំបន់ហ្កាហ្សា ដោយនាំឲ្យការរិះគន់យ៉ាងចាស់ដៃពីសមាជិកភាគច្រើននៃអង្គការសហប្រជាជាតិ។

សេចក្តីព្រាងដែលដាក់ចេញដោយសមាជិកមិនអចិន្ត្រៃយ៍ទាំង ១០ របស់ក្រុមប្រឹក្សា បានទាមទារបទឈប់បាញ់ជាបន្ទាន់ ដោយគ្មានលក្ខខណ្ឌ និងអចិន្ត្រៃយ៍ ក៏ដូចជាការដោះលែងជាបន្ទាន់និងគ្មានលក្ខខណ្ឌនូវចំណាប់ថ្នូរទាំងអស់។