​ហៃទី៖ មេដឹកនាំ​ក្រុម​ជន​អន្ធពាល​ឈ្មោះថា 400 Mawozo ដែល​នគរបាល​និយាយ​ថា កំពុង​ចាប់ជំរិត​សមាជិក​ក្រុម​សាសនទូត​អាមេរិក​ និង​កាណាដា​ចំនួន ​១៧​នាក់​ ត្រូវ​គេ​ឃើញ​នៅ​ក្នុង​វីដេអូ​ដែល​បាន​ចេញ​ផ្សាយ​កាលពី​ថ្ងៃ​ព្រហស្បតិ៍ ដោយ​និយាយ​ថា ​ខ្លួន​នឹង​សម្លាប់​ពួក​គេ​ទាំង​នោះ​ប្រសិនបើ​មិន​ទទួល​បាន​អ្វី​ដែល​រូបគេ​កំពុង​ទាមទារ​នោះ​។​

​វីដេអូ​ដែល​បាន​បង្ហោះ​លើ​បណ្ដាញ​សង្គម​បង្ហាញ​ថា លោក Wilson Joseph ស្លៀក​សម្លៀកបំពាក់​ឈុត​ពណ៌​ខៀវ កាន់​មួក​ខៀវ និង​ពាក់​ឈើឆ្កាង​ធំ​ជុំវិញ​ក​របស់​គេ​។​ ​គេ​បាន​និយាយ​នៅ​ក្នុង​វីដេអូ​នោះ​ថា "​ខ្ញុំ​ស្បថ​ឲ្យ​រន្ទះបាញ់​ថា ប្រសិនបើ​ខ្ញុំ​មិន​ទទួល​បាន​អ្វី​ដែល​ខ្ញុំ​សុំ​ទេ​នោះ ខ្ញុំ​នឹង​បាញ់​គ្រាប់កាំភ្លើង​ចំក្បាល​ជនជាតិ​អាមេរិក​ទាំងនោះ។​ ​លោក​ក៏បាន​គំរាម​នាយករដ្ឋមន្ត្រី Ariel Henry និង​ស្នងការ​នគរបាល​ជាតិ​របស់​ប្រទេស Haiti ផង​ដែរ ខណៈ​ពេល​លោក​និយាយ​នៅមុខ​មឈូស​បើកចំហ ដែល​ទំនងជា​ដាក់​សមាជិក​មួយ​ចំនួន​នៃ​ក្រុម​របស់​គេ ដែល​ត្រូវ​បាន​សម្លាប់​នា​ពេល​ថ្មីៗ​នេះ​។ ​មេដឹកនាំ​ក្រុម​នេះ​ក៏បាន​និយាយ​ផង​ដែរ​ថា អ្នក​ធ្វើ​ឱ្យ​ខ្ញុំ​យំ​។ ខ្ញុំ​យំ​ចេញ​ទឹកភ្នែក​។ ប៉ុន្តែ​ខ្ញុំ​នឹង​ធ្វើ​ឲ្យ​អ្នក​រាល់គ្នា​យំ​វិញ​ដោយ​ស្រក់​ឈាម​។​

​ស្រប​ពេល​ការ​ទាមទារ​ប្រាក់ ​១៧​លាន​ដុល្លារ​ជា​ថ្នូរ​នឹង​ការ​ដោះ​លែង​ពួកគេ ពលរដ្ឋ​ហៃ​ទី​រាប់​រយ​នាក់​បាន​បិទ​ផ្លូវ និង​ដុត​សំបក​កង់​រថយន្ត​ក្នុង​រដ្ឋធានី​របស់​ប្រទេស​នេះ​កាលពី​ថ្ងៃ​ព្រហស្បតិ៍ ដើម្បី​ប្រឆាំង​ទៅ​នឹង​កង្វះ​ប្រេងឥន្ធនៈ​ធ្ងន់ធ្ងរ និង​ការ​កើន​ឡើង​នៃ​ការ​ចាប់​ជំរិត​មនុស្ស​ដោយ​ក្រុម​ជន​អន្ធពាល​។ ​ក្រុម​ជន​អន្ធពាល​នេះ​ក៏​ត្រូវ​បាន​គេ​ដាក់​ការ​ស្ដីបន្ទោស​ផង​ដែរ ​ចំពោះ​ការ​បិទ​ស្ថានីយ​ចែកចាយ​ឧស្ម័ន និង​ការ​លួច​យក​រថយន្ត​ផ្គត់ផ្គង់ ដែល​ក្រុម​មន្ត្រី​បាន​និយាយ​ថា​បាន​នាំ​ឱ្យ​មាន​កង្វះខាត​ប្រេងឥន្ធនៈ​។ ក្រុម​បាតុករ​បាន​ប៉ះទង្គិច​ជាមួយ​នគរបាល​នៅ​តំបន់​ខ្លះ ដោយ​ក្រុម​មន្ត្រី​បាន​បាញ់​ឧស្ម័ន​បង្ហូរទឹកភ្នែក​ ដែល​លាយឡំ​ជាមួយ​នឹង​ផ្សែង​ខ្មៅ​ក្រាស់​ដែល​ហុយ​ចេញពី​ការ​ដុត​សំបក​កង់​រថយន្ត​ដែល​ជា​របាំង​ការពារ​៕

អត្ថបទ៖ សុខមាន