ការិយាល័យរបស់លោក លោក Lai Ching-te នៅថ្ងៃសុក្រ (ទី២២ ខែវិច្ឆិកា) នេះ បានឲ្យដឹងថា មេដឹកនាំកោះតៃវ៉ាន់រូបនេះ នឹងធ្វើទស្សនកិច្ចនៅកោះទូវ៉ាលូ (Tuvalu) ប៉ាឡូ (Palau) និងម៉ាសល (Marshall) នៅប៉ាស៊ីហ្វិក។

មន្ត្រីទទួលបន្ទុកស្ថាប័នការបរទេសរងរបស់កោះតៃវ៉ាន់ លោក Tien Chung-kwang បានប្រាប់អ្នកយកព័ត៌មានថា លោក Lai នឹងចាកចេញពីកោះតៃវ៉ាន់ នៅថ្ងៃទី៣០ ខែវិច្ឆិកា ហើយត្រឡប់មកវិញ នៅថ្ងៃទី៦ ខែធ្នូ។ លោក Tien បាននិយាយថា ការឈប់សំចតឆ្លងកាត់របស់លោក Lai គឺស្ថិតក្នុងដំណាក់កាលរៀបចំផែនការ ហើយនឹងត្រូវបានប្រកាសនៅពេលវេលាសមស្រប។

សារព័ត៌មាន Reuters បានរាយការណ៍កាលពីសប្តាហ៍មុនថា លោក Lai គ្រោងនឹងឈប់សំចតនៅកោះហាវ៉ៃរបស់សហរដ្ឋអាមេរិក ហើយប្រហែលជាទៅទស្សនកិច្ច នៅកោះហ្គាម។ ក្នុងចំណោមប្រទេសទាំង ១២ ដែលរក្សាចំណងការទូតជាផ្លូវការជាមួយកោះតៃវ៉ាន់ ជាកោះដែលត្រូវបានទាមទារដោយប្រទេសចិននោះ មានប្រទេស៣ នៅប៉ាស៊ីហ្វិក គឺកោះប៉ាឡូ ម៉ាសល និងទូវ៉ាលូ។

គួរបញ្ជាក់ថា កោះតៃវ៉ាន់ជាធម្មតាប្រើប្រាស់ដំណើរទស្សនកិច្ចទៅកាន់ប្រទេសសម្ព័ន្ធមិត្ត ដើម្បីធ្វើនូវអ្វីដែលជាការឆ្លងកាត់ផ្លូវការ នៅក្នុងសហរដ្ឋអាមេរិក ជាអ្នកគាំទ្រអន្តរជាតិ និងជាអ្នកផ្គត់ផ្គង់អាវុធដ៏សំខាន់បំផុតរបស់កោះតៃវ៉ាន់ ដែលតែងតែធ្វើឲ្យទីក្រុងប៉េកាំងមានកំហឹង។ នៅរាល់ការឈប់សំចតទាំងនោះ មេដឹកនាំកោះតៃវ៉ាន់តែងជួបជាមួយអ្នកនយោបាយជាមិត្ត និងថ្លែងសុន្ទរកថា៕