មេដឹកនាំកូរ៉េខាងជើង លោក គីម ជុងអ៊ុន បាននិយាយថា សហគមន៍អន្តរជាតិឥឡូវនេះ កំពុងជួបប្រទះនូវរយៈពេលដ៏ហិង្សា និងចលាចលខ្លាំងបំផុត ចាប់តាំងពីសង្គ្រាមលោកលើកទី២ ដោយសារតែសកម្មភាពរបស់សហរដ្ឋអាមេរិក។

ទីភ្នាក់ងារព័ត៌មានមជ្ឈិមកូរ៉េ បានដកស្រង់សម្តីលោកដែលបាននិយាយថា៖«ឥឡូវនេះ យើងអាចឃើញពិភពលោក ដ៏ច្របូកច្របល់ និងហិង្សាបំផុត ចាប់តាំងពីសង្គ្រាមលោកលើកទី២ មក» ។ លោក គីម ជុងអ៊ុន បានពន្យល់ថា៖«ល្បិចឥតអៀនខ្មាស់» របស់សហរដ្ឋអាមេរិក ដើម្បីបង្កើតឥទ្ធិពលគ្រប់គ្រងរបស់ខ្លួន និង«ការមិនចុះសម្រុងគ្នា និងការប្រឈមមុខគ្នាគ្រប់ប្រភេទ» បានឆ្លងផុត«ចំណុចសំខាន់នៃការផ្ទុះអាវុធ និងការកើនឡើងភាពតានតឹង ទៅជា «សង្រ្គាមអយុត្តិធម៌ និងដ៏គួរឲ្យភ័យខ្លាច» និង «ដ៏គ្រោះមហន្តរាយដ៏បំផ្លិចបំផ្លាញ»។ 

លោក គីម ជុងអ៊ុន បាននិយាយនៅក្នុងពិធីបើកការតាំងពិព័រណ៌អាវុធ ក្នុងទីក្រុងព្យុងយ៉ាង ដោយបង្ហាញពីគំរូនៃអាវុធយុទ្ធសាស្ត្រ និងអាវុធតាក់ទិចដែលបានទាក់ទាញការយកចិត្តទុកដាក់ពីពិភពលោកទាំងមូលថា៖«ការពិតនាពេលបច្ចុប្បន្ននេះ គឺថា រយៈពេលជិត ១០០ឆ្នាំ កន្លងទៅ នៅពេលដែលរបបហ្វាស៊ីសនិយម នៅអឺរ៉ុប និងអាស៊ី បានរួបរួមគ្នា ដើម្បីបំផ្លាញសណ្តាប់ធ្នាប់ពិភពលោក កងកម្លាំងជ្រុលនិយម នៅភាគខាងលិច និងភាគខាងកើត ដែលស្ថិតក្រោមការដឹកនាំរបស់ចក្រពត្តិនិយមអាមេរិក កំពុងព្យាយាមបង្កើតសណ្តាប់ធ្នាប់ដែលប្រើអំណាចជិះជាន់ និងលោភលន់។