ប្រេសិតពិសេសសហរដ្ឋអាមេរិកលោក Amos Hochstein បានជួបជាមួយរដ្ឋមន្រ្តីក្រសួងការពារជាតិអ៊ីស្រាអែលលោក Israel Katz នៅទីក្រុងតែល អាវីវ ដើម្បីព្យាយាមសម្រេចបានបទឈប់បាញ់ ជាការបញ្ចប់សង្រ្គាមជាមួយក្រុមហេសបូឡារបស់លីបង់ ។

 លោក Hochstein គឺជាអ្នកសម្របសម្រួលអាមេរិកដែលបាននិយាយថា បទឈប់បាញ់ស្ថិតនៅក្នុងកណ្តាប់ដៃរបស់ពួកយើង អំឡុងដំណើរទស្សនកិច្ចរបស់លោកទៅកាន់ប្រទេសលីបង់កាលពីថ្ងៃអង្គារនោះ បានជួបជាមួយនាយករដ្ឋមន្រ្តីអ៊ីស្រាអែលលោក Benjamin Netanyahu ផងដែរ កាលពីថ្ងៃពុធ ។ នៅពុំទាន់មានសេចក្តីថ្លែងការណ៍ភ្លាមៗនោះទេ ។ 

 ដំណើរការការទូតនេះ មានគោលបំណងបញ្ចប់ជម្លោះដែលបានបង្កឲ្យមានការបំផ្លិចបំផ្លាញទ្រង់ទ្រាយធំនៅក្នុងប្រទេសលីបង់ ចាប់តាំងពីអ៊ីស្រាអែលបើកការវាយប្រហាររបស់ខ្លួន ជាមួយនឹងការវាយប្រហារតាមច្រកអាកាសនៅតាមតំបន់ជាច្រើនក្នុងប្រទេសមួយនេះ និងបញ្ជូនទាហានចូលទៅកាន់តំបន់ភាគខាងត្បូងលីបង់ ។

 អ៊ីស្រាអែល និយាយថា ពួកគេមានគោលបំណងឲ្យពលរដ្ឋរបស់ខ្លួនរាប់ម៉ឺននាក់ដែលបានជម្លៀសខ្លួនពីតំបន់ភាគខាងជើងដោយសារការផ្លោងគ្រាប់រ៉ុក្កែតរបស់ក្រុមហេសបូឡានោះ វិលត្រឡប់ទៅកាន់ផ្ទះសម្បែងរបស់ពួកគេវិញ ។ ក្រុមហេសបូឡា បើកការវាយប្រហារអ៊ីស្រាអែល ជាការគាំទ្រក្រុមហាម៉ាស់ ពេលសង្រ្គាមចាប់ផ្តើមនៅតំបន់ហ្កាហ្សា កាលពីខែតុលា ឆ្នាំ ២០២៣ ។

 ក្រុមហេសបូឡា ដែលរងការប៉ះពាល់ធ្ងន់ធ្ងរចាប់តាំងពីអ៊ីស្រាអែលចាប់ផ្តើមការវាយលុករបស់ពួកគេកាលពីខែកញ្ញានោះ នៅតែបន្តផ្លោងគ្រាប់រ៉ុក្កែតឥតឈប់ឈរចូលទៅក្នុងប្រទេសអ៊ីស្រាអែល និងបានវាយប្រហារទីក្រុងតែលអាវីវ ក្នុងសប្តាហ៍នេះ ។ ក្រុមយុទ្ធជនរបស់ពួកគេ កំពុងធ្វើសង្រ្គាមជើងគោកជាមួយទាហានអ៊ីស្រាអែល នៅតំបន់ភាគខាងត្បូងលីបង់ ៕