សេវាកម្មនគរបាល និងមន្រ្តីយោធាអាហ្វ្រិកខាងត្បូងបាននិយាយកាលពីថ្ងៃព្រហស្បតិ៍ថា ប្រតិបត្តិការជួយសង្រ្គោះសម្រាប់កម្មករអណ្តូងរ៉ែជាប់ខ្លួនក្រោមដី កំពុងធ្វើឡើង ស្របពេលក្តីបារម្ភកើនឡើងចំពោះសុខុមាលភាពរបស់ពួកគេ ។

កម្មករអណ្តូងរ៉ែខុសច្បាប់ជាង ១ពាន់នាក់ បានចេញមកក្រៅវិញហើយ ក្នុងរយៈពេលប៉ុន្មានសប្តាហ៍កន្លងមកនេះ ស្របពេលដែលនគរបាលចាត់វិធានការបោសសម្អាត ហើយសាកសពមនុស្សម្នាក់ ត្រូវបាននាំមកលើ ។ កម្មករអណ្តូររ៉ែរាប់រយនាក់ទៀត ត្រូវបានគេជឿថានៅជាប់ខ្លួនក្រោមដី ស្ថិតនៅជម្រៅដីជាង ២គ.ម ។

អង្គការសង្គមស៊ីវិលតំណាងឲ្យអ្នកដែលនៅជាប់ខ្លួនក្នុងអណ្តូងរ៉ែ Stilfontein និយាយថា កម្មករអណ្តូងរ៉ែ ចង់ចេញក្រៅ ប៉ុន្តែប្រតិបត្តិការរបស់នគរបាល បានពន្យាពេលការចេញក្រៅរបស់ពួកគេ គឺជាអ្វីមួយដែលអគ្គលេខាធិការសហព័ន្ធសហជីពពាណិជ្ជកម្មអាហ្វ្រិកខាងត្បូងលោក Zwelinzima Vavi ចាត់ទុកថា វាគឺជាការស្លាប់មនុស្សបន្តិចម្តងៗ ។

អ្នកនាំពាក្យសេវាកម្មនគរបាលអាហ្វ្រិកខាងត្បូង(SAPS)លោកវរសេនីយ៍ត្រី Athlenda Mathe បានបញ្ជាក់ឡើងវិញពីការប្តេជ្ញាចិត្តរបស់ពួកគេចំពោះបេសកកម្មសង្រ្គោះ ។

លោក Mathe និយាយនៅតុលាការជាន់ខ្ពស់ Pretoria ថា បទបញ្ជារបស់ពួកយើងច្បាស់លាស់ គឺដើម្បីការពារ និងប្រយុទ្ធប្រឆាំងនឹងឧក្រឹដ្ឋកម្ម ហើយពួកយើងនៅពិនិត្យមើលថាតើអ្វីកំពុងកើតឡើងនៅទីនោះ គឺជាឧក្រិដ្ឋកម្មសុទ្ធសាធឬយ៉ាងណា ។ បេសកកម្មសង្រ្គោះរបស់ពួកយើងនៅតែបន្ត ៕