អ្នកនាំពាក្យក្រសួងការបរទេសអ្នកស្រី Maria Zakharova បាននិយាយនៅក្នុងសន្និសីទសារព័ត៌មានមួយថា មូលដ្ឋានការពារមីស៊ីលអាមេរិក នៅក្នុងប្រទេសប៉ូឡូញ ត្រូវបានគេចាត់ទុកថា ជាគោលដៅអាទិភាពសម្រាប់លទ្ធភាពវាយប្រហារ ដោយកងកម្លាំងប្រដាប់អាវុធរុស្ស៊ី។

អ្នកការទូតរូបនេះ បាននិយាយថា៖«ដោយសារកម្រិតនៃការគំរាមកំហែងដែលបង្កឡើងដោយទីតាំងយោធាលោកខាងលិចបែបនេះ មូលដ្ឋានការពារមីស៊ីលនៅក្នុងប្រទេសប៉ូឡូញ ត្រូវបានរួមបញ្ចូលជាយូរមកហើយ ក្នុងចំណោមគោលដៅអាទិភាពសម្រាប់ការវាយប្រហារដែលអាចនឹងកើតឡើង។ ប្រសិនបើចាំបាច់ គោលដៅនេះ អាចសម្រេចបានដោយប្រើសព្វាវុធទំនើបៗជាច្រើន។ 

អ្នកស្រី Zakharova បាននិយាយថា គម្រោងសាងសង់សហរដ្ឋអាមេរិក-ណាតូ ដែលបន្តអស់រយៈពេលជិតមួយទសវត្សរ៍ ជាមួយនឹងការមិនយកចិត្តទុកដាក់ទាំងស្រុងចំពោះការព្រួយបារម្ភផ្នែកសន្តិសុខរបស់   រុស្ស៊ី គឺជាការផ្តោតការយកចិត្តទុកដាក់យ៉ាងជាប់លាប់របស់រុស្ស៊ី ។ អ្នកស្រី បានសង្កត់ធ្ងន់ថា រុស្ស៊ីបានចំណាយពេលប៉ុន្មានឆ្នាំនេះ ក្នុងការរៀបចំវិធានការទប់ទល់ ជាការឆ្លើយតប។

អ្នកស្រី Zakharova បានពណ៌នាអំពីការបង្កើតមូលដ្ឋានបែបនេះថា ជាទង្វើបង្កហេតុដ៏អាក្រក់មួយផ្សេងទៀត ដោយហៅវា ថាជាផ្នែកនៃ «សកម្មភាពបង្កអស្ថិរភាពយ៉ាងស៊ីជម្រៅ ដោយជនជាតិអាមេរិក និង   សម្ព័ន្ធមិត្តអាត្លង់ទិកខាងជើងរបស់ពួកគេ នៅក្នុងដែនយុទ្ធសាស្ត្រនេះ»។