ក្រសួងសុខាភិបាលហ្កាហ្សា និយាយថា ជនប៉ាឡេស្ទីនយ៉ាងហោច ២០នាក់ រួមទាំងកុមារផងដែរ ត្រូវបានសម្លាប់នៅក្នុងការវាយប្រហាររបស់អ៊ីស្រាអែលកាលពីថ្ងៃព្រហស្បតិ៍លើអគារផ្តល់ជាទីជម្រកស្នាក់នៅសម្រាប់គ្រួសារជម្លៀសខ្លួននៅក្នុងទីក្រុងហ្កាហ្សា ។

 ប្រតិបត្តិការរុករក នៅបន្តក្នុងថ្ងៃសុក្រនេះ សម្រាប់សាកសពមនុស្សបន្ថែមទៀតដែលជាប់ក្រោមគំនរបាក់បែកអគារ ខណៈពិធីបុណ្យសព បានធ្វើឡើងសម្រាប់មនុស្សស្លាប់ដទៃទៀត នៅក្រៅមន្ទីរពេទ្យ Al-Ahli al-Arabi មុនពេលយកពួកគេទៅបញ្ចុះ ។

 ក្រសួងសុខាភិបាលប៉ាឡេស្ទីនៅតំបនបិទច្រកមួយនេះ បាននិយាយថា ការវាយប្រហារបស់អ៊ីស្រាអែលលើតំបន់ហ្កាហ្សា បានសម្លាប់មនុស្សយ៉ាងហោច ៤៤.០៥៦នាក់ និងមនុស្ស ១០៤.២៦៨នាក់ផ្សេងទៀត បានរងរបួស ចាប់តាំងពីថ្ងៃទី ៧ ខែតុលា ឆ្នាំ ២០២៣រហូតមក ។

 សង្រ្គាមមួយនេះ បានចាប់ផ្តើមផ្ទុះឡើង ជាការឆ្លងតបនឹងការវាយប្រហាររបស់ក្រុមសកម្មប្រយុទ្ធដឹកនំាដោយក្រុមហាម៉ាស់ដែលបានសម្លាប់មនុស្ស ១.២០០នាក់ និងចាប់ចំណាប់ថ្នូរ នៅអ៊ីស្រាអែល ។

គួរឲ្យដឹងថា តុលាការព្រហ្មទណ្ឌអន្តរជាតិ(ICC)កាលពីថ្ងៃព្រហស្បតិ៍ បានចេញដីកាចាប់ខ្លួននាយករដ្ឋមន្រ្តីអ៊ីស្រាអែលលោក Benjamin Netanyahu និងអតីតរដ្ឋមន្រ្តីក្រសួងការពារជាតិរបស់លោក ក៏ដូចជាមេដឹកនាំក្រុមហាម៉ាស់លោក Ibrahim Al-Masri ជុំវិញឧក្រិដ្ឋកម្មសង្រ្គាមចោទប្រកាន់ប្រឆាំងមនុស្សជាតិនៅក្នុងជម្លោះហ្កាហ្សា ៕