​បាល់ទាត់៖ ​ក្រុម​សារិកា​ព្រៃ Newcastle United បានចាប់ផ្តើម​បើក​ការចរចា​ជាមួយ​អតីត​អ្នកចាត់ការ AS Roma លោក Paulo Fonseca ដើម្បី​មក​បន្ត​តំណែង​លោក Steve Bruce ដែល​បាន​ចាក​ចេញពី​ក្លិប​។ ​អ្នកចាត់ការ​ពីរ-បីនាក់​ផ្សេងទៀត​កំពុង​ស្ថិតក្រោម​ការពិចារណា​របស់​ប្រធាន​ក្លិប​ថ្មី​។

​​អតីត​អ្នកចាត់ការ Bournemouth, Eddie Howie, អតីត​អ្នកចាត់ការ Dortmund, Lucien Favre និង​អ្នក​ចាត់ការក្រុម​ជំរើសជាតិ​ប៊ែ​ល​ហ្ស៊ិ​ក​បច្ចុប្បន្ន​លោក Roberto Martinez សុទ្ធតែ​ស្ថិតក្នុង​ជំរើស​។ ​អ្នក​ចាត់ការ​សញ្ជាតិ​ព័រទុយហ្កាល់​លោក Paulo Fonseca ធ្លាប់បាន​ដឹកនាំ AS Roma ពីរ​រដូវ​កាល ២០១៩ ដល់ ២០២១ ដោយបាន​ដឹកនាំ​ក្រុម​បញ្ចប់​នៅ​ចំណាត់ថ្នាក់​លេខ៥ ក្នុង​រដូវ​កាល​ដំបូង និង​ឡើង​វគ្គ​ពាក់កណ្តាល​ផ្តាច់ព្រ័ត្រ UEFA Europa League រដូវ​កាល​មុន​មុនពេល​ជំនួស​ដោយ Jose Mourinho​។

​​បុរស​វ័យ ៤៨​ឆ្នាំ​រូបនេះ​ក៏​ធ្លាប់បាន​ដឹកនាំ Shakhtar Donetsk ផងដែរ ហើយ​កៀក​នឹង​ក្លាយជា​អ្នក​ចាត់​ការ Tottenham Hotspur ផងដែរ​កាលពី​ខែមិថុនា មុន​ពេលដែល​ក្លិន​នៅ​ទីក្រុង​ឡុង​ដ៍​មួយ​នេះ​ផ្លាស់ប្ដូរ​ចិត្ត​ជ្រើសរើស​លោក Nuno Espirito Santo វិញ​។ ​​Newcastle បច្ចុប្បន្នកំពុង​ស្វែងរក​ជ័យជំនះ​ដំបូង​នៅ English Premier League រដូវ​កាល​នេះ​ក្រោយ​លេង​បាន ៨ប្រកួត​ស្មើ៣ ចាញ់៥ មាន ៣ពិន្ទុ​ប៉ុណ្ណោះ​។ ​Newcastle ត្រូវ​ជួប​ម្ចាស់ផ្ទះ Crystal Palace ថ្ងៃ​សៅរ៍​នេះ​ក្រោម​ការដឹកនាំ​របស់​គ្រូ​ជំនួយ Graeme Jones បណ្តោះអាសន្ន​៕

​អត្ថបទ​៖​នាង សុភា​វុ​ធ