ប្រធានាធិបតី លោក វ្ល៉ាឌីមៀ ពូទីន បាននិយាយកាលពីថ្ងៃសុក្រថា រុស្ស៊ីនឹងបន្តសាកល្បងមីស៊ីលល្បឿនលឿនជាងសំឡេង Oreshnik ថ្មីរបស់ខ្លួន ក្នុងការប្រយុទ្ធ និងមានស្តុកទុកសម្រាប់ការប្រើប្រាស់។

លោកពូទីន បាននិយាយមួយថ្ងៃបន្ទាប់ពីរុស្ស៊ី បានបាញ់អាវុធរយៈចម្ងាយមធ្យមថ្មីចូលទៅក្នុងទឹកដីអ៊ុយក្រែន ជាលើកដំបូង ជាជំហានដែលលោកបាននិយាយថា ត្រូវបានជំរុញដោយការប្រើប្រាស់របស់អ៊ុយក្រែននូវមីស៊ីលបាលីស្ទីកផលិតដោយអាមេរិក និងមីស៊ីលស៊ីបគោលដៅរបស់អង់គ្លេស ដើម្បីវាយប្រហារលើទឹកដីរុស្ស៊ី។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថា ទីក្រុងគីវ កំពុងធ្វើការជាមួយដៃគូប្រទេសលោកខាងលិចរបស់ខ្លួន ដើម្បីរៀបចំប្រព័ន្ធទប់ទល់ទៅនឹង «ហានិភ័យថ្មី»។ លោកពូទីន បានចាត់ទុកការប្រើប្រាស់មីស៊ីលល្បឿនលឿនជាងសំឡេង Oreshnik លើកដំបូង ថាជាការសាកល្បងដោយជោគជ័យ និងបាននិយាយថា ការប្រើប្រាស់ថែមទៀតនឹងមានជាបន្តបន្ទាប់។

លោកបាននិយាយនៅក្នុងសេចក្តីអធិប្បាយតាមទូរទស្សន៍ទៅកាន់មន្ត្រីការពារជាតិ និងអ្នកផលិតមីស៊ីលថា «យើង នឹងបន្តការសាកល្បងអាវុធទាំងនេះ រួមទាំងក្នុងលក្ខខណ្ឌប្រយុទ្ធ ដោយផ្អែកលើស្ថានភាព និងលក្ខណៈនៃការគំរាមកំហែងផ្នែកសន្តិសុខ ដែលត្រូវបានបង្កើតឡើងសម្រាប់ប្រទេសរុស្ស៊ី»។

បន្ថែមលើនេះ យើងមានស្តុកអាវុធប្រភេទនេះ ជាការស្តុកទុកប្រព័ន្ធឲ្យបានរួចរាល់សម្រាប់ការប្រើប្រាស់។

មន្ត្រីអាមេរិកម្នាក់ បាននិយាយថា អាវុធដែលរុស្ស៊ីប្រើគឺជាអាវុធពិសោធន៍។ រុស្ស៊ីមានចំនួនកំណត់នូវអាវុធប្រភេទនេះ ហើយនេះពុំមែនជាសមត្ថភាពដែលរុស្ស៊ី អាចដាក់ពង្រាយជាទៀងទាត់នៅលើសមរភូមិ នោះទេ។

មីស៊ីលរយៈចម្ងាយមធ្យម អាចបាញ់បានក្នុងចម្ងាយពី ៣.០០០គីឡូម៉ែត្រ ទៅ៥.៥០០គីឡូម៉ែត្រ ដែលអាចបាញ់បានគ្រប់ទីកន្លែងនៅអឺរ៉ុប ឬនៅភាគខាងលិចសហរដ្ឋអាមេរិក ពីប្រទេសរុស្ស៊ី ។