ការវាយប្រហាររបស់អ៊ីស្រាអែល ទៅលើភាគខាងត្បូងប្រទេសលីបង់ និងនៅជាយក្រុងរដ្ឋធានី Beirut កាលពីថ្ងៃសុក្រ បានសម្លាប់គ្រូពេទ្យសង្គ្រោះបឋមយ៉ាងហោចណាស់៥នាក់ ខណៈកងទ័ពជើងគោកបានប៉ះទង្គិចជាមួយក្រុមអ្នកប្រយុទ្ធហេសបូឡា នៅភាគខាងត្បូង។

អ៊ីស្រាអែល បានបន្តជំរុញយុទ្ធនាការយោធាដ៏ខ្លាំងក្លារបស់ខ្លួនប្រឆាំងក្រុមប្រដាប់អាវុធហេសបូឡា គាំទ្រដោយអ៊ីរ៉ង់ ហើយសង្ឃឹមថា កិច្ចខិតខំប្រឹងប្រែងធ្វើឡើងដោយបេសកជនរបស់សហរដ្ឋអាមេរិក អាចនាំទៅរកបទឈប់បាញ់ ដែលខិតចូលជិតមកដល់។

អ្នកសម្របសម្រួលរបស់សហរដ្ឋអាមេរិក លោក Amos Hochstein បាននិយាយកាលពីដើមសប្តាហ៍នេះនៅទីក្រុង Beirut ថា បទឈប់បាញ់គឺ «នៅក្នុងកណ្តាបដៃរបស់យើង»។ លោក Amos Hochstein បានធ្វើដំណើរទៅជួបនាយករដ្ឋមន្ត្រីអ៊ីស្រាអែល លោក Benjamin Netanyahu និងរដ្ឋមន្ត្រីការពារជាតិអ៊ីស្រាអែល លោក Katz មុនពេលត្រឡប់ទៅទីក្រុងវ៉ាស៊ីនតោនវិញ។

ដំណើរទស្សនកិច្ចរបស់លោក មានគោលបំណងបញ្ចប់អរិភាពដែលមានរយៈពេលជាងមួយឆ្នាំ រវាងអ៊ីស្រាអែល និងក្រុមហេសបូឡា នៅតាមបណ្តោយព្រំដែនភាគខាងត្បូងប្រទេសលីបង់ ដែលបានរីកធំឡើងយ៉ាងខ្លាំង នៅពេលដែលអ៊ីស្រាអែលបានបង្កើនការវាយលុករបស់ខ្លួន កាលពីចុងខែកញ្ញា និងបានបញ្ជូនកងទ័ពជើងគោកចូលទៅក្នុងប្រទេសលីបង់ កាលពីថ្ងៃទី១ ខែតុលា។