ជនអន្តោប្រវេសន៍រាប់រយនាក់ រួមមានទាំងកុមារតូចៗ បានប្រញាប់ប្រញាល់ ឡើងជិះលើរថភ្លើង ដឹកទំនិញ កាលពីថ្ងៃសុក្រ ដើម្បីធ្វើដំណើរឆ្ពោះទៅកាន់ព្រំដែនរួមរបស់ប្រទេសម៉ិកស៊ិក ជាមួយសហរដ្ឋអាមេរិក។

នៅភាគខាងត្បូងរដ្ឋ Veracruz ប្រទេសម៉ិកស៊ិក មនុស្សពេញវ័យ បានជួយក្មេងៗ ឡើងជិះលើរថភ្លើង នៅទីក្រុង Coatzacoalcos ប្រទេសម៉ិកស៊ិក។

បន្ទាប់ពីការដើរដោយថ្មើរជើង ការធ្វើដំណើរតាមរថភ្លើងដឹកទំនិញបានផ្តល់ការសម្រាកខ្លះសម្រាប់ជនអន្តោប្រវេសន៍ដែលអស់កម្លាំង។ ប៉ុន្តែវាកើតមានហានិភ័យ ដោយជនអន្តោប្រវេសន៍បានស្លាប់ ឬត្រូវបាត់បង់អវយវៈ បន្ទាប់ពីធ្លាក់ពីលើរថភ្លើង។

ប្រធានាធិបតីជាប់ឆ្នោតមកពីគណបក្សសាធារណរដ្ឋ លោក ដូណាល់ ត្រាំ ត្រូវបានគេរំពឹងថានឹងបង្ក្រាបលើការធ្វើអន្តោប្រវេសន៍ខុសច្បាប់ និងព្យាយាមរឹតបន្តឹងការធ្វើអន្តោប្រវេសន៍ស្របច្បាប់ នៅពេល លោក ត្រឡប់ទៅកាន់តំណែងនៅសេតវិមានវិញ នៅថ្ងៃទី២០ ខែមករា ដោយធ្វើតាមការសន្យានៃយុទ្ធនាការ របស់លោក។

វិធានការមួយក្នុងចំណោមវិធានការជាច្រើន ដែលបានធ្វើឲ្យការចាប់អារម្មណ៍កាន់តែច្រើន គឺកិច្ចខិតខំប្រឹងប្រែងនិរទេសជនអន្តោប្រវេសន៍ក្នុងទ្រង់ទ្រាយធំបំផុតក្នុងប្រវត្តិសាស្ត្ររបស់សហរដ្ឋអាមេរិក ដោយផ្តោតលើឧក្រិដ្ឋជន ប៉ុន្តែមានបំណងបញ្ជូនមនុស្សរាប់លាននាក់ត្រឡប់ទៅប្រទេសកំណើតរបស់ពួកគេវិញ។