ក្រុមបាតុកររាប់ពាន់នាក់ ដែលភាគច្រើនជាអ្នកគាំទ្រក្រុមហ៊ូទី បានមកប្រមូលផ្តុំគ្នានៅក្នុងរដ្ឋធានី សាណា(Sanaa) របស់ប្រទេសយេម៉ែន កាលពីថ្ងៃសុក្រ ដើម្បីថ្កោលទោសការបន្តវាយលុករបស់អ៊ីស្រាអែល ទៅលើតំបន់ហ្កាហ្សា និងការវាយប្រហារទៅលើក្រុមហេសបូឡា នៅប្រទេសលីបង់។

ការប្រមូលផ្តុំគ្នា ដែលបានធ្វើឡើងនៅក្នុងទីលាន al-Sabeen របស់ទីក្រុង ត្រូវបានបង្ហាញដោយការស្រែកថា «ស្លាប់ទៅអាមេរិក ស្លាប់ទៅអ៊ីស្រាអែល» ដែលក្រុមអ្នកតវ៉ា បានគ្រវីបដា និងលើកកាន់អាវុធ។

ព្រឹត្តិការណ៍នេះ ត្រូវបានចូលរួមដោយអ្នកនាំពាក្យយោធារបស់ក្រុមហ៊ូទី លោក Yahya Sarea ដែលបានថ្លែងទៅកាន់ហ្វូងមនុស្ស និងបានប្រកាសថា កងកម្លាំងប្រដាប់អាវុធក្រុមហ៊ូទី បានអនុវត្តប្រតិបត្តិការយោធា ដាក់គោលដៅទៅលើមូលដ្ឋានទ័ពអាកាសអ៊ីស្រាអែល ក្នុងទីក្រុង Negev ប្រទេសអ៊ីស្រាអែល។

បាតុករ និយាយថា ពួកយើងបានចេញតវ៉ាដើម្បីគាំទ្របងប្អូនរបស់យើង ដែលត្រូវបានបោះបង់ចោលដោយក្រុមប្រទេសអារ៉ាប់។ ប៉ុន្តែយើងជាជនជាតិអារ៉ាប់ពិត ហើយយើងគឺជាអ្នកលះបង់ចំពោះអារ៉ាប់។ ការប្រមូលផ្តុំគ្នានេះ បានឈានដល់ការដុតទង់ជាតិអាមេរិក និងអ៊ីស្រាអែល។