ប្រទេសកូរ៉េខាងជើង នៅថ្ងៃសៅរ៍ ទី២៣ វិច្ឆិកានេះ បានថ្កោលទោស សមយុទ្ធយោធារួមគ្នាកាលពីពេលថ្មីៗនេះ ធ្វើឡើងដោយសហរដ្ឋអាមេរិក កូរ៉េខាងត្បូង និងប្រទេសជប៉ុន ដោយព្រមានថា ខ្លួននឹងចាត់វិធានការភ្លាមៗប្រសិនបើចាំបាច់ ដើម្បីការពាររដ្ឋរបស់ខ្លួន។

កាលពីសប្តាហ៍មុន ប្រទេសទាំងបី បានធ្វើសមយុទ្ធរួមគ្នារយៈពេលបីថ្ងៃ ដែលចូលរួមដោយយន្តហោះចម្បាំង និងយន្តហោះល្បាតដែនសមុទ្រ ព្រមទាំងនាវាផ្ទុកយន្តហោះ ដើរដោយថាមពលនុយក្លេអ៊ែររបស់សហរដ្ឋអាមេរិក USS George Washington ។

ក្រសួងការពារជាតិកូរ៉េខាងជើង បាននិយាយដោយប្រើឈ្មោះផ្លូវការរបស់ប្រទេសថា យើងព្រមានខ្លាំងៗ ចំពោះសហរដ្ឋអាមេរិក និងអ្នកដើរតាមរបស់ខ្លួន ដែលបង្កអរិភាពដល់កូរ៉េខាងជើង ឱ្យបញ្ឈប់ជាបន្ទាន់នូវរាល់សកម្មភាពបង្កហេតុនិងអស្ថិរភាព ដែលអាចជំរុញឱ្យមានការប្រឈមមុខដាក់គ្នាខាងយោធានៅលើឧបទ្វីបកូរ៉េ និងតំបន់ជិតខាង ឱ្យទៅជាជម្លោះប្រដាប់អាវុធពិតប្រាកដ។

ប្រព័ន្ធផ្សព្វផ្សាយ KCNA របស់កូរ៉េខាងជើង រាយការណ៍តាមសេចក្តីថ្លែងការណ៍ថា យោធា នឹងរក្សាជម្រើសទាំងអស់ដែលមាន ហើយចាត់វិធានការបន្ទាន់ ប្រសិនបើចាំបាច់ ដើម្បីគ្រប់គ្រងហានិភ័យជាមុន ខណៈកំពុងត្រូវបានឃ្លាំមើលសកម្មភាពយោធាយ៉ាងកៀកកិត ពីសំណាក់សហរដ្ឋអាមេរិក និងសម្ព័ន្ធមិត្តរបស់ខ្លួន។