កម្មវិធីស្បៀងអាហារពិភពលោក (WFP) របស់អង្គការសហប្រជាជាតិ (UN) កាលពីថ្ងៃសុក្រ (ទី២២ ខែវិច្ឆិកា) បានឲ្យដឹងថា ថវិកាប្រមាណ ១៦,៩ពាន់លានដុល្លារ នឹងត្រូវការជាចាំបាច់ ដើម្បីជួយដល់ប្រជាជននៅលើពិភពលោក ដែលត្រូវការជំនួយស្បៀងអាហារមនុស្សធម៌បន្ទាន់បំផុត ក្នុងឆ្នាំ២០២៥។

ក្នុងរបាយការណ៍ Global Outlook ឆ្នាំ២០២៥ ដែលត្រូវបានចេញផ្សាយនៅឯទីស្នាក់ការកណ្តាលរបស់ WFP នាទីក្រុងរ៉ូម ប្រទេសអ៊ីតាលី ទីភ្នាក់ងារនេះបានលើកឡើងថា យ៉ាងហោចណាស់មនុស្ស ៣៤៣លាននាក់ នៅទូទាំង ៧៤ប្រទេស បច្ចុប្បន្នកំពុងប្រឈមនឹងអសន្តិសុខស្បៀងអាហារ ដែលកើនឡើង ១០ភាគរយ បើប្រៀបធៀបទៅនឹងឆ្នាំមុន។

របាយការណ៍នេះបានប្រាប់ថា បរិបទរបស់ប្រទេសដែល WFP ប្រតិបត្តិការ កំពុងកា្លយជាបញ្ហាកាន់តែស្មុគស្មាញ ដោយធ្វើឲ្យការទៅដល់មនុស្សដែលត្រូវការ មានការលំបាក និងចំណាយកាន់តែច្រើន។ បើយោងតាមរបាយការណ៍ដដែលនេះ បានបង្ហាញទៀតថា កង្វះខាតក្នុងការផ្តល់មូលនិធិដែលបានលើកឡើង សម្រាប់ឆ្នាំ២០២៤ បានបង្ខំឲ្យ WFP កាត់បន្ថយសកម្មភាពរបស់ខ្លួនរួចហើយ នៅឆ្នាំនេះ ដែលជារឿយៗតែងបន្សល់ទុកនូវភាពងាយរងគ្រោះបំផុតមួយចំនួនតាមក្រោយ។

របាយការណ៍នេះបានព្យាករថា នៅឆ្នាំ២០២៥ ថវិកាប្រមាណជា ១៦,៩ពាន់លានដុល្លារ នឹងត្រូវការ ដើម្បីផ្តល់ជំនួយដល់មនុស្ស ១២៣លាននាក់ដែលជួបប្រទះនឹងភាពអត់ឃ្លាន៕