លោកប្រធានាធិបតីអ៊ុយក្រែន Volodymyr Zelenskiy បាននិយាយកាលពីថ្ងៃសៅរ៍ ២៣ ខែវិច្ឆិកាថា ការវាយប្រហារដោយយានដ្រន និងមីស៊ីលរបស់រុស្ស៊ី បានបំផ្លិចបំផ្លាញហេដ្ឋារចនាសម្ព័ន្ធកំពង់ផែអ៊ុយក្រែនចំនួន ៣២១ កន្លែង ចាប់តាំងពីខែកក្កដាឆ្នាំមុន។

លោកបានបន្ថែមថា នាវាដឹកទំនិញចំនួន២០គ្រឿង ដែលជាកម្មសិទ្ធិរបស់ប្រទេសផ្សេងទៀតក៏ត្រូវបានខូចខាតផងដែរដោយសារតែការវាយប្រហាររបស់រុស្ស៊ី។  

ទីក្រុងមូស្គូ បានបដិសេធម្តងហើយម្តងទៀតដែលថាខ្លួនបានវាយប្រហារដាក់គោលដៅលើជនស៊ីវិល ។

អ៊ុយក្រែនជាប្រទេសដាំស្រូវសាលី និងពោតដ៏សំខាន់មួយរបស់ពិភពលោក ហើយមុនការឈ្លានពានរបស់រុស្ស៊ី ប្រទេសនេះបាននាំចេញគ្រាប់ធញ្ញជាតិប្រហែល ៦ លានតោនក្នុងមួយខែតាមសមុទ្រខ្មៅ។

នៅពេលរុស្ស៊ីចាប់ផ្តើមការលុកលុយរបស់ខ្លួនកាលពីព្រឹកព្រលឹមថ្ងៃទី២៤ខែកុម្ភៈ ឆ្នាំ ២០២២ ខ្លួនបានបិទច្រកសមុទ្រខ្មៅរបស់អ៊ុយក្រែន។

ការនាំចេញត្រូវបានបន្តឡើងវិញកាលពីខែកក្កដា ឆ្នាំ ២០២២ ក្រោមគំនិតផ្តួចផ្តើមគ្រាប់ធញ្ញជាតិសមុទ្រខ្មៅ ដែលជាកិច្ចព្រមព្រៀងសម្របសម្រួលដោយអង្គការសហប្រជាជាតិ និងទួរគី។ ប៉ុន្តែមួយឆ្នាំក្រោយមក រុស្ស៊ីបានចាកចេញពីកិច្ចព្រមព្រៀងនេះ។  

ចាប់តាំងពីពេលនោះមក អ៊ុយក្រែនបាននាំចេញគ្រាប់ធញ្ញជាតិ និងផលិតផលអាហារផ្សេងទៀត ដោយប្រើច្រករបៀងផ្ទាល់របស់ខ្លួន ដែលឆ្លងកាត់ដែនទឹករបស់ប្រទេសរ៉ូម៉ានី ប៊ុលហ្គារី និងទួរគី៕