ការតវ៉ាបានផ្ទុះឡើងនៅក្នុងទីក្រុង Tunceli ភាគខាងកើតប្រទេសទួរគី នៅចុងសប្ដាហ៍នេះ បន្ទាប់ពីរដ្ឋាភិបាលទួរគីបានដកតំណែងអភិបាលក្រុងដែលគាំទ្រដោយជនជាតិឃឺដជាប់ឆ្នោតពីរនាក់ចេញពីមុខតំណែងរបស់ពួកគេ។ 

យោងតាមក្រសួងមហាផ្ទៃ អភិបាលក្រុងត្រូវបានផ្ដន្ទាទោសពីបទឧក្រិដ្ឋពាក់ព័ន្ធនឹងអំពើភេរវកម្ម ហើយមន្ត្រីរដ្ឋត្រូវបានតែងតាំងជាបណ្ដោះអាសន្នដើម្បីជំនួសតំណែងពួកគេ។ 

អភិបាលតំបន់បានជំនួសអភិបាលក្រុងលោក Cevdet Konak នៅទីក្រុង Tunceli ខណៈអ្នកគ្រប់គ្រងក្នុងតំបន់ត្រូវបានតែងតាំងជំនួសតំណែងអភិបាលក្រុង Ovacik គឺលោក Mustafa Sarigul ។

លោក Konak គឺជាសមាជិកនៃគណបក្ស DEM គាំទ្រដោយជនជាតិឃឺដ ដែលមានអាសនៈចំនួន ៥៧នៅក្នុងសភាជាតិ ហើយលោក Sarigul គឺជាសមាជិកនៃគណបក្សប្រឆាំងដ៏សំខាន់ គឺគណបក្សសាធារណរដ្ឋប្រជាមានិត (CHP) ។

 អភិបាលក្រុងដែលគាំទ្រជនជាតិឃឺដរាប់សិបនាក់មកពីគណបក្សកាន់តំណែងមុន ត្រូវបានដកចេញពីមុខតំណែងរបស់ពួកគេលើការចោទប្រកាន់ស្រដៀងគ្នាកាលពីអតីតកាល៕