អ៊ីស្រាអែលបានវាយប្រហារលើទីតាំងរឹងមាំភាគខាងត្បូងរដ្ឋធានីបេរូតរបស់ក្រុមហេសបូឡា កាលពីថ្ងៃអាទិត្យ ២៤ វិច្ឆិកា ខណៈប្រព័ន្ធផ្សព្វផ្សាយរដ្ឋលីបង់រាយការណ៍ពីការប្រយុទ្ធគ្នាយ៉ាងខ្លាំងក្លាក្នុងតំបន់ព្រំដែន ហើយយោធាអ៊ីស្រាអែលបាននិយាយថា អាវុធប្រហែល ២៥០ គ្រាប់ត្រូវបានបាញ់លើទឹកដីខ្លួន។

ការប្រយុទ្ធគ្នាដ៏កក្រើកនេះបានកើតឡើង ទោះមានការអំពាវនាវបទឈប់បាញ់រវាងអ៊ីស្រាអែល និងហេសបូឡា ពីសំណាក់អ្នកការទូតជាន់ខ្ពស់របស់សហភាពអឺរ៉ុប លោក Josep Borrell ខណៈកំពុងបំពេញទស្សនកិច្ចនៅប្រទេសលីបង់កាលពីថ្ងៃអាទិត្យក៏ដោយ។

យោធាអ៊ីស្រាអែលបាននិយាយថា ក្រុមហេសបូឡាគាំទ្រដោយអ៊ីរ៉ង់បានបាញ់គ្រាប់ផ្លោងប្រហែល ២៥០ គ្រាប់ទៅកាន់ប្រទេសអ៊ីស្រាអែលក្នុងអំឡុងពេលថ្ងៃ ដែលជាតួលេខប្រចាំថ្ងៃខ្ពស់បំផុតមួយនៃសង្រ្គាម។យោងតាមយោធាបានឱ្យដឹងថា កាលពីថ្ងៃទី ២៤ ខែកញ្ញា មានគ្រាប់ផ្លោងចំនួន ៣៥០ គ្រាប់ ត្រូវបានបាញ់ពីប្រទេសលីបង់។

នៅក្នុងប្រទេសលីបង់ មួយថ្ងៃបន្ទាប់ពីរលកនៃការវាយប្រហាររបស់អ៊ីស្រាអែល ដែលក្រសួងសុខាភិបាលនិយាយថាបានសម្លាប់មនុស្ស៨៤នាក់ អ៊ីស្រាអែលបានវាយប្រហារជាថ្មីលើតំបន់ជាយរដ្ឋធានីបេរូត ដែលជាទីតាំងរឹងមាំរបស់ក្រុមហេសបូឡា។

ជម្លោះនេះបានសម្លាប់មនុស្សយ៉ាងហោចណាស់៣.៧៥៤នាក់ នៅក្នុងទឹកដីលីបង់ ចាប់តាំងពីខែតុលាឆ្នាំ២០២៣ អ្នកស្លាប់ភាគច្រើននៅក្នុងខែកញ្ញាកន្លងទៅនេះ៕