​ហៃទី៖ មេដឹកនាំ​សម្ព័ន្ធ​ភាព​ដ៏​ល្បីឈ្មោះ ​នៃ​ក្រុម​អន្ធពាល​ហិង្សា​នៅ​រដ្ឋធានី​ប្រទេស​ហៃ​ទី​កាលពី​ថ្ងៃ​សុក្រ បាន​ដើរ​ជាមួយ​អ្នកគាំទ្រ​ប្រដាប់​ដោយ​អាវុធ​តាម​ដង​ផ្លូវ​នៃ​តំបន់ La Saline ដែល​ជា​សង្កាត់​ក្រីក្រ​មួយ​នៅ​ទីក្រុង​ព័រ​អូ​-​ប្រាំង រួម​ជាមួយ​ប្រជាជន​រាប់​រយ​នាក់​។ លោក Jimmy Cherizier គឺជា​ប្រធាន​ក្រុម ​G9 ជា​ក្រុមចម្រុះ​បង្កើត​ឡើង​ដោយ​ក្រុម​ទំនើង​ចំនួន ៩ក្រុម​ដែល​គ្រប់គ្រង​តំបន់​ធំៗ​របស់​ទីក្រុង​។

លោក Cherizier ជា​អតីត​នគរបាល​ម្នាក់​ដែល​ត្រូវ​បាន​សង្ស័យ​ថា ​មាន​ជាប់​ពាក់ព័ន្ធ​ទៅ​នឹង​ការ​សម្លាប់​មនុស្ស​ច្រើន​នាក់​នៅ​ក្នុង​រដ្ឋ​ធានី​ប្រទេស​ហៃ​ទី និង​ជា​វីរបុរស​នៅ​ក្នុង​តំបន់​បាន​និយាយ​ថា ​ក្រុម​របស់​លោក​គ្មាន​ជាប់​ពាក់ព័ន្ធ​ទៅ​នឹង​ការ​ចាប់​ជំរិត​អ្នក​ផ្សព្វផ្សាយ​សាសនា​នោះ​ទេ​។ ​លោក Cherizier បាន​និយាយ​ពី​វេទិកា​មួយ​បន្ទាប់ពី​លោក​ និង​សមាជិក​ក្រុម​មាន​កាន់​អាវុធ​ថា យើង​ជា​សមាជិក​នៃ​គ្រួសារ ​G9 យើង​មិន​ពាក់ព័ន្ធ​ទៅ​នឹង​ការ​ចាប់​ជំរិត​នេះ​ទេ យើង​មិន​ចូលរួម​ក្នុង​ការ​ចាប់​ជំរិត​ឡើយ​។

យើង​ជា​ក្រុម​ប្រដាប់​អាវុធ​មិនមែន​ជា​ក្រុម​អន្ធ​ពាល​ទេ យើង​គឺជា​ក្រុម​ប្រដាប់​អាវុធ​ដែល​ប្រមូល​ផ្តុំ​មនុស្ស​ប្រុស​ស្រី​ដែល​មាន​គំនិត​ដូចគ្នា​។ ខណៈ​ដែល​ក្រុម​របស់​លោក​ល្បីល្បាញ​ខាង​អំពើ​ហិង្សាដែល​ពួកគេ​បាន​ធ្វើ​ទៅលើ​មនុស្ស​ទូទៅ​ ពួកគេ​មិន​ត្រូវ​បាន​សង្ស័យ​ថា ​ជាប់​ពាក់ព័ន្ធ​នឹង​ការ​ចាប់​ជំរិត​អ្នក​ផ្សព្វផ្សាយ​សាសនា​អាមេរិក ១៧​នាក់​កាលពី​ថ្ងៃ​សៅរ៍​សប្ដាហ៍​មុន​ឡើយ​។​ អ្នក​ផ្សព្វ​ផ្សាយ​សាសនា​ត្រូវ​បាន​ចាប់ខ្លួន​ដោយ​ក្រុម​ប្រជែង​ដែល​គេ​ស្គាល់​ថា 400 Mawozo កំពុង​ទាមទារ​ប្រាក់​លោះ​ចំនួន ១​លាន​ដុល្លារ​ក្នុង​ម្នាក់ៗ​សម្រាប់​ការ​ដោះ​លែង​ពួកគេ​៕

អត្ថបទ៖ ប៊ុនថន