អង្គភាពការពារជនស៊ីវិលនៅតំបន់ហ្កាហ្សាស្ទ្រីបកាលពីថ្ងៃអាទិត្យ បានព្រមានអំពី «គ្រោះមហន្តរាយមនុស្សធម៌» ដោយសារតែទឹកភ្លៀង ដែលអាចបណ្តាលឲ្យមានទឹកជំនន់ និងការខូចខាតដល់តង់របស់ជនភៀសខ្លួន។

អាជ្ញាធរការពារជនស៊ីវិល បាននិយាយនៅក្នុងសេចក្តីថ្លែងការណ៍មួយថា៖«ដោយសារតែភ្លៀង តង់របស់ជនភៀសខ្លួន នៅក្នុងជំរំជម្រកនៅ Yarmouk Stadium ឧទ្យានក្រុងហ្កាហ្សា ជំរំឆ្នេរ និងតង់ដែលបានដំឡើងនៅក្នុងសាលារៀន នៅក្នុងទីក្រុងហ្កាហ្សា ត្រូវរងការខូចខាត»។

អាជ្ញាធរនេះ បានបន្ថែមថា៖«យើងកំពុងប្រឈមមុខនឹងទិដ្ឋភាពមនុស្សធម៌ដ៏មហន្តរាយ ប្រសិនបើជនភៀសខ្លួននៅក្នុងជំរំ នៅតែបន្តស្ថិតក្នុងស្ថានភាពនេះ ជាពិសេសចំពោះការខូចខាតតង់ដ៏ច្រើនរបស់ពួកគេ និងភាពមិនសមរម្យសម្រាប់ទីជម្រករបស់ពួកគេ»។

អាជ្ញាធរបានសម្តែងការព្រួយបារម្ភថា លក្ខខណ្ឌអាចនឹងកាន់តែយ៉ាប់យ៉ឺនជាមួយនឹងការចាប់ផ្តើមនៃ រដូវរងា ដោយបានព្រមានថា អ្នកស្រុកដែលរស់នៅក្នុងតំបន់ទំនាប ប្រឈមមុខនឹង «គ្រោះមហន្តរាយពិតប្រាកដ» ប្រសិនបើពួកគេ ត្រូវបានប៉ះពាល់នឹងទឹកភ្លៀង ពីព្រោះបណ្តាញលូ ត្រូវបានបិទដោយសារតែការបំផ្លាញហេដ្ឋារចនាសម្ព័ន្ធរបស់កងទ័ពអ៊ីស្រាអែល នៅក្នុងតំបន់ហ្កាហ្សាស្ទ្រីប។

លោក Mahmoud Basal អ្នកនាំពាក្យអាជ្ញាធរការពារជនស៊ីវិល បានព្រមានអំពីហានិភ័យនៃការដួលរលំផ្ទះ និងអគារដែលអ្នកស្រុកបានភៀសខ្លួន ដោយសារតែសំណង់ទាំងនេះ បានរងនូវស្នាមប្រេះ និងការខូចខាតយ៉ាងធ្ងន់ធ្ងរ ដោយសារតែការទម្លាក់គ្រាប់បែក នៅក្នុងតំបន់របស់ពួកគេ។