ក្រុមអ្នកឃ្លាំមើលសិទ្ធិមនុស្សស៊ីរី បាននិយាយថា យ៉ាងហោចណាស់យុទ្ធជនស៊ីរីដែលគាំទ្រដោយទីក្រុងអង់ការ៉ាចំនួន ១៥នាក់ ត្រូវបានសម្លាប់កាលពីថ្ងៃអាទិត្យ បន្ទាប់ពីកងកម្លាំងដឹកនាំដោយជនជាតិឃើដ បានលួចចូលក្នុងទឹកដីរបស់ពួកគេ នៅភាគខាងជើងនៃប្រទេសនេះ។

ក្រុមអ្នកសង្កេតការណ៍ដែលមានបណ្តាញប្រភពនៅក្នុងប្រទេសស៊ីរី បាននិយាយថា យុទ្ធជនមកពីកងកម្លាំងប្រជាធិបតេយ្យស៊ីរី (SDF) ដែលគ្រប់គ្រងតំបន់ភាគឦសានរបស់ប្រទេសនេះ «បានលួចចូលក្នុង ទីតាំងឈរជើងរបស់ក្រុមយុទ្ធជនដែលគាំទ្រដោយទួរគី» នៅតំបន់ជនបទអាឡិបប៉ូ។

ក្រុមអ្នកឃ្លាំមើល បាននិយាយថា៖«ភាគីទាំងពីរ បានចូលរួមក្នុងការប៉ះទង្គិចគ្នាដោយហិង្សា» ដែលបានសម្លាប់អ្នកប្រយុទ្ធដែលគាំទ្រដោយទីក្រុងអង់ការ៉ាចំនួន ១៥នាក់។

អ្នកឆ្លើយឆ្លងព័ត៌មាន AFPម្នាក់ នៅភាគខាងជើងនៃប្រទេសស៊ីរី បាននិយាយថា ការប៉ះទង្គិចគ្នា បានកើតឡើង នៅជិតទីក្រុង Al-Bab ជាកន្លែងដែលអាជ្ញាធរបានអះអាងថា សាលារៀនមួយចំនួន នឹងត្រូវផ្អាក នៅថ្ងៃចន្ទនេះ ដោយសារអំពើហិង្សា។

SDF គឺជាកងកម្លាំងគាំទ្រដោយសហរដ្ឋអាមេរិក ដែលបានដឹកនាំការប្រយុទ្ធប្រឆាំងនឹងក្រុមរដ្ឋឥស្លាម ដេស (Daesh) នៅក្នុងទីតាំងរឹងមាំចុងក្រោយនៅក្នុងប្រទេសស៊ីរី មុនពេលក្រុមនេះ បរាជ័យនៅក្នុងទឹកដីរបស់ខ្លួន ក្នុងឆ្នាំ ២០១៩។