ទាហានកូរ៉េខាងជើងមួយក្រុម ដែលក្លែងខ្លួនជា «ជនជាតិដើមភាគតិច» នៃតំបន់ចុងបូព៌ារបស់ប្រទេស   រុស្ស៊ី បានចូលរួមប្រយុទ្ធជាមួយទាហានអ៊ុយក្រែន នៅតំបន់ឃើស( Kursk) ព្រំដែនភាគខាងលិចរបស់  រុស្ស៊ី។ នេះបើយោងតាមសេចក្តីរាយការណ៍របស់ព័ត៌មានអ៊ុយក្រែន។

ដោយដកស្រង់សម្តីមន្ត្រីយោធាជាន់ខ្ពស់របស់ទីក្រុងគីវ សារព័ត៌មាន RBC Ukraine កាលពីថ្ងៃអាទិត្យ (ម៉ោងក្នុងតំបន់) បានរាយការណ៍ថា ទាហានកូរ៉េខាងជើងជាង ១១.000 នាក់ បានឈរជើងរួចហើយនៅក្នុងតំបន់ឃើស ហើយបានចូលរួមក្នុងការប្រយុទ្ធប្រឆាំងនឹងកងទ័ពអ៊ុយក្រែន។

លោក Anatolii Barhylevych នាយអគ្គសេនាធិការនៃកងកម្លាំងប្រដាប់អាវុធអ៊ុយក្រែន ត្រូវបានដកស្រង់សម្តី ដោយនិយាយថា៖«ទាហានភាគច្រើន គឺស្ថិតនៅក្នុងអង្គភាពយោធាទូទៅ។ ពួកគេ បានក្លែងបន្លំជាជនជាតិដើមភាគតិចនៃតំបន់ចុងបូព៌ា។ ពួកគេមានឯកសារត្រឹមត្រូវ»។

លោកបានបន្តថា៖«ពួកគេត្រូវបានបណ្តុះបណ្តាល ដើម្បីធ្វើប្រតិបត្តិការ ក្នុងផ្នែកអឺរ៉ុប។

របាយការណ៍នេះ បានត្រូវបានធ្វើឡើង ចំពេលមានការព្រួយបារម្ភផ្នែកសន្តិសុខកាន់តែខ្លាំងឡើងលើកិច្ចសហប្រតិបត្តិការយោធារវាងកូរ៉េខាងជើង និងរុស្ស៊ី ដោយមន្ត្រីកូរ៉េខាងត្បូង និងសហរដ្ឋអាមេរិក បានបញ្ជាក់ថា កូរ៉េខាងជើងបានបញ្ជូនទាហានជាង ១០.000នាក់ ទៅកាន់ប្រទេសរុស្ស៊ី ដើម្បីគាំទ្រការឈ្លានពានរបស់ខ្លួនប្រឆាំងនឹងអ៊ុយក្រែន។