លោកនាយករដ្ឋមន្ត្រី បេនចាមីន ណេតាន់យ៉ាហ៊ូ ( Benjamin Netanyahu) កាលពីថ្ងៃអាទិត្យ បានថ្កោលទោសអ្នកតាំងលំនៅជនជាតិជ្វីហ្វ ដែលបានវាយប្រហារលើមន្ត្រីយោធាជាន់ខ្ពស់អ៊ីស្រាអែល រួមទាំងលោកឧត្តមសេនីយ៍ឯក Avi Bluth ដែលជាប្រធានទីបញ្ជាការកណ្តាលរបស់កងទ័ព នៅតំបន់វេសបែង។ 

កងទ័ពអ៊ីស្រាអែល បាននិយាយថា អ្នកតាំងលំនៅមួយក្រុម បានដើរតាមក្រោយ លោក Bluth និងមន្រ្តីផ្សេងទៀត នៅក្នុងទីក្រុង Hebronនៃតំបន់វេសបែងកាលពីថ្ងៃសុក្រ ដោយបានបិទច្រកចេញរបស់ពួកគេ និងបានវាយប្រហារលើពួកគេ។ កងទ័ពបានបន្ថែមថា កុបករចំនួន ៥នាក់ ត្រូវបានចាប់ខ្លួន។

ការិយាល័យនាយករដ្ឋមន្ត្រី បាននិយាយនៅក្នុងសេចក្តីថ្លែងការណ៍មួយថា៖«រាល់អំពើហិង្សាដែលបានបង្កទៅលើមន្ត្រីយោធា និងទាហានអ៊ីស្រាអែល ត្រូវតែដោះស្រាយតាមច្បាប់ឲ្យបានពេញលេញ»។

ហ្វូងមនុស្សមួយចំនួន បានស្រែកថា លោក Bluth ជាជនក្បត់ជាតិ ដែលបានទស្សនកិច្ចទីក្រុង Hebron ដើម្បីចូលរួមព្រឹត្តិការណ៍សាសនាប្រចាំឆ្នាំ នៅក្នុងទីក្រុងនេះ។