រដ្ឋមន្ត្រីការិយាល័យខុទ្ទកាល័យអង់គ្លេស លោក Pat McFadden នៅថ្ងៃចន្ទ (ទី២៥ ខែវិច្ឆិកា) នេះ នឹងលើកឡើងថា ប្រទេសអង់គ្លេស និងសម្ព័ន្ធមិត្តអង្គការណាតូ (NATO) ត្រូវតែឈានមុខគេនៅក្នុង «ការប្រណាំងប្រជែងអាវុធ AI (បញ្ញាសិប្បនិម្មិត) ថ្មី» ដោយព្រមានថា ឧក្រិដ្ឋជនតាមប្រព័ន្ធអ៊ីនធឺណិតរបស់រុស្ស៊ី កំពុងកំណត់គោលដៅកាន់តែខ្លាំងឡើងៗ ចំពោះប្រទេសដែលគាំទ្រអ៊ុយក្រែន។

នៅពេលថ្លែងទៅកាន់សន្និសីទ NATO Cyber Defense Conference (សន្និសីទការពារជាតិរតាមប្រព័ន្ធអ៊ិនធឺណិតរបស់អង្គការណាតូ) នៅទីក្រុងឡុងដ្រ៍ ប្រទេសអង់គ្លេស លោក McFadden នឹងបង្ហាញពីផែនការរបស់ចក្រភពអង់គ្លេស ក្នុងការបង្កើតមន្ទីរពិសោធន៍ថ្មី សម្រាប់សន្តិសុខ AI ដើម្បីជួយបង្កើតឧបករណ៍ការពារតាមអ៊ីនធឺណិតឲ្យកាន់តែប្រសើរជាងមុន និងរៀបចំការស៊ើបការណ៍ពីការវាយប្រហារនានា។

នៅក្នុងការព្រមានចុងក្រោយបង្អស់ អំពីទីក្រុងមូស្គូ ដែលបង្កើនការវាយប្រហារតាមអ៊ីនធឺណិតលើបណ្ដាប្រទេសដែលគាំទ្រអ៊ុយក្រែន លោក McFadden នឹងអំពាវនាវឲ្យសម្ព័ន្ធភាពយោធា អាជីវកម្ម និងស្ថាប័នដែលដឹកនាំដោយសហរដ្ឋអាមេរិក ធ្វើ «អ្វីៗគ្រប់យ៉ាងដែលពួកគេអាចធ្វើបាន ក្នុងការធានាដល់ប្រព័ន្ធឌីជីថលរបស់ពួកគេ» ដើម្បីការពារខ្លួនពីអ្វីដែលលោកហៅថា ការលុកលុយកាន់តែខ្លាំងឡើងៗរបស់រុស្ស៊ី។

គួរបញ្ជាក់ថា ទីក្រុងមូស្គូធ្លាប់បានបដិសេធថា ខ្លួនមិនអនុវត្តការវាយប្រហារតាមប្រព័ន្ធអ៊ីនធឺណិត ហើយក្រុមមន្ត្រីបានហៅការចោទប្រកាន់បែបនេះថា ជាការប៉ុនប៉ងញុះញង់ឲ្យកើតអារម្មណ៍ ប្រឆាំងរុស្ស៊ី។

លោក McFadden នឹងលើកឡើងថា AI អាចត្រូវបានបំពាក់អាវុធប្រឆាំងនឹងប្រទេសទាំងនោះ ដែលគាំទ្រអ៊ុយក្រែន គិតចាប់តាំងពីប្រទេសរុស្ស៊ី បានចាប់ផ្តើមការលុកលុយពេញលេញរបស់ខ្លួន នៅឆ្នាំ២០២២ ដើម្បីជំរុញអ្វីដែលលោកបានពិពណ៌នាថា ជាការពិតដែលកើតមានប្រចាំថ្ងៃ សម្រាប់សង្គ្រាមតាមប្រព័ន្ធអ៊ីនធឺណិតប្រឆាំងនឹងចក្រភពអង់គ្លេស និងសម្ព័ន្ធមិត្តរបស់ខ្លួន៕