នៅពេលដែលប្រធាន COP29 លោក Mukhtar Babayev បានឡើងលើវេទិកាបិទកិច្ចប្រជុំនៃកិច្ចប្រជុំកំពូលអាកាសធាតុ នៅទីក្រុងបាគូ កាលពីព្រឹកថ្ងៃអាទិត្យ (ទី២៤ ខែវិច្ឆិកា) ដោយសង្ឃឹមថា នឹងឈានដល់កិច្ចព្រមព្រៀងមួយដែលសម្រេចបានដោយលំបាក ស្តីពីហិរញ្ញវត្ថុអាកាសធាតុពិភពលោក លោកបានកាន់នូវសុន្ទរកថាចំនួន ២ ជាប់នឹងខ្លួនលោក។

បើយោងតាមចំនួនប្រភព ២ ដែលដឹងពីបញ្ហា បានប្រាប់សារព័ត៌មាន Reuters ក្នុងលក្ខខណ្ឌមិនបញ្ចេញឈ្មោះថា សុន្ទរកថាមួយត្រូវបានបង្កើតឡើង ជុំវិញកិច្ចព្រមព្រៀងដែលត្រូវបានរំពឹងទុកថា នឹងកើតមានឡើង ខណៈដែលមួយទៀត ត្រៀមសម្រាប់លទ្ធភាពនៃការដួលរលំកិច្ចប្រជុំកំពូលនោះ។

ប្រភពមួយ ដែលជាមន្ត្រីម្នាក់នៅក្នុងគណៈប្រធាន COP29 បាននិយាយថា៖ «មែនហើយ ពួកយើងបានរៀបចំសុន្ទរកថាផ្សេងគ្នា ដើម្បីត្រៀមសម្រាប់សេណារីយោផ្សេងគ្នា ប៉ុន្តែនៅពេលដែលយើងឈានជើងឡើងទៅកាន់វេទិកា យើងមានទំនុកចិត្តលើភាពជោគជ័យរបស់យើង»។

នៅទីបញ្ចប់ លោក Babayev បានគោះញញួរតាមរយៈផែនការផ្ដល់ហិរញ្ញវត្ថុ ៣០០ពាន់លានដុល្លារ ដើម្បីជួយប្រទេសកំពុងអភិវឌ្ឍន៍ទប់ទល់នឹងការចំណាយកើនឡើង ដោយសារការឡើងកម្ដៅផែនដី នៅទសវត្សរ៍ក្រោយ នៅមុនពេលអ្នករិះគន់មានពេលវេលា ដើម្បីជំទាស់ ដោយអនុញ្ញាតឲ្យលោកអាននូវសុន្ទរកថាវិជ្ជមានបន្ថែមទៀត។

តែយ៉ាងណាក្ដី ការរៀបចំរបស់លោក Babayev ដើម្បីត្រៀមសម្រាប់លទ្ធផលផ្សេងគ្នា នៅឯកិច្ចប្រជុំកំពូលដែលមិនចុះសម្រុងគ្នា ក្នុងប្រទេសសមុទ្រកាសព្យែន គឺអាសែប៊ៃហ្សង់ បានឆ្លុះបញ្ចាំងពីអ្វីដែលអ្នកតាមដានជាច្រើន បានដឹងរួចមកហើយមុនពេលវាចាប់ផ្តើម នោះគឺថា ការពិភាក្សាអំពីអាកាសធាតុ នៅទីក្រុងបាគូ នឹងមិនប្រព្រឹត្តទៅដោយរលូននោះឡើយ។ 

ក្ដីរំពឹង ដើម្បីទទួលបានកិច្ចព្រមព្រៀង មានកាន់តែតិចទៅៗ ដោយសារការព្រួយបារម្ភនៃការលេចឡើងនូវការដកខ្លួនរបស់សហរដ្ឋអាមេរិកពីកិច្ចសហប្រតិបត្តិការអាកាសធាតុពិភពលោក ភាពចលាចលភូមិសាស្ត្រនយោបាយ និងការកើនឡើងនូវនយោបាយឯកោនិយម ដែលបានធ្វើឲ្យបញ្ហាបម្រែបម្រួលអាកាសធាតុមិនស្ថិតក្នុងបញ្ជីអាទិភាពចម្បងរបស់ពិភពលោក៕