នាយករដ្ឋមន្ត្រីអូស្ត្រាលី លោក Anthony Albanese នៅថ្ងៃចន្ទ (ទី២៥ ខែវិច្ឆិកា) នេះ បាននិយាយថា ក្រុមហ៊ុនបណ្ដាញសង្គម នឹងត្រូវតម្រូវឲ្យបំផ្លាញទិន្នន័យផ្ទាល់ខ្លួនដែលត្រូវបានប្រើ ដើម្បីផ្ទៀងផ្ទាត់អាយុរបស់អ្នកប្រើប្រាស់ ជាផ្នែកនៃអ្វីដែលរដ្ឋាភិបាលលើកឡើងថា ជាការហាមប្រាមឈានមុខគេលើពិភពលោក ចំពោះអ្នកដែលមានអាយុក្រោម ១៦ឆ្នាំ មិនឲ្យចូលប្រើប្រាស់សេវាកម្មបណ្ដាញសង្គម។

អូស្ត្រាលីគ្រោងនឹងសាកល្បងប្រព័ន្ធផ្ទៀងផ្ទាត់អាយុដែលអាចរួមបញ្ចូលជីវមាត្រ ឬការកំណត់អត្តសញ្ញាណរបស់រដ្ឋាភិបាល ដើម្បីពង្រឹងបណ្ដាញសង្គមកាត់ផ្ដាច់អាយុ ដែលជាការគ្រប់គ្រងដ៏លំបាកបំផុតមួយចំនួន ដែលដាក់ដោយប្រទេសជាច្រើន រហូតមកដល់បច្ចុប្បន្ននេះ។

លោក Albanese បានប្រាប់សភានៅថ្ងៃទី២៥ ខែវិច្ឆិកានេះថា៖ «វានឹងមានតម្រូវការផ្នែកឯកជនភាពយ៉ាងខ្លាំងក្លា និងតឹងរ៉ឹង ដើម្បីការពារព័ត៌មានផ្ទាល់ខ្លួនរបស់ប្រជាជន ក្នុងនោះរួមទាំងកាតព្វកិច្ច ក្នុងការបំផ្លាញព័ត៌មានដែលបានផ្តល់ឲ្យ នៅពេលដែលអាយុត្រូវបានផ្ទៀងផ្ទាត់»។

ច្បាប់នេះនឹងប៉ះពាល់ដល់បណ្ដាញសង្គម Instagram និង Facebook របស់ក្រុមហ៊ុន Meta Platforms បណ្ដាញ TikTok របស់ក្រុមហ៊ុន Bytedance ហើយនិងបណ្ដាញសង្គម X និង Snapchat របស់លោក Elon Musk។

បណ្ដាញសង្គមទាំងនោះ ត្រូវប្រឈមនឹងការផាកពិន័យរហូតដល់ ៣២លានដុល្លារអាមេរិក ប្រសិនបើមិនគោរពតាមច្បាប់។ រដ្ឋាភិបាលបានឲ្យដឹងថា ខ្លួនមានបំណងអនុម័តសេចក្តីព្រាងច្បាប់នេះឲ្យចូលជាច្បាប់ជាធរមាន នៅបំណាច់ឆ្នាំរបស់សភា នាថ្ងៃទី២៨ ខែវិច្ឆិកា ដោយពន្លឿនដំណើរការឲ្យបានលឿន តាមរយៈសភាជាន់ខ្ពស់ និងជាន់ទាប៕