កំពង់ធំ៖ លោក ជា ពុំ ប្រធានលេខាធិការរដ្ឋានរៀបចំការបោះឆ្នោតខេត្តកំពង់ធំ ប្រាប់ទូរទស្សន៍ BTV នៅថ្ងៃទី២៤ ខែតុលា ឆ្នាំ២០២១ ថា ដំណើរការនៃការចុះឈ្មោះបោះឆ្នោត នៅក្នុងខេត្តកំពង់ធំ ចាប់ផ្តើមដំណើរការពីថ្ងៃទី១២ ខែតុលា ឆ្នាំ២០២១ នឹងបន្តរហូតដល់ថ្ងៃទី៣០ ខែវិច្ឆិកា ឆ្នាំ២០២១ ខាងមុខ។

លោកបន្តថា ចំនួនឈ្មោះប្រជាពលរដ្ឋនៅក្នុងបញ្ជីឈ្មោះបោះឆ្នោត នៅឆ្នាំ ២០២០ សរុបចំនួន ៤១២,១៣៦នាក់, ទីតាំងឬការិយាល័យដែលកំពុងដំណើរការពិនិត្យ ឈ្មោះ និងចុះឈ្មោះថ្មីជូនប្រជាពលរដ្ឋមានចំនួន៨១ទីតាំង ឃុំ សង្កាត់, ប្រើប្រាស់មន្រ្តីដំណើរការ ចុះឈ្មោះសរុបចំនួន២៤៣នាក់ ស្រី៤១នាក់។ ទន្ទឹមនេះលេខាធិការដ្ឋានរៀបចំការបោះឆ្នោតខេត្ត កំពង់ធំ បានរៀបចំលិខិតអញ្ជើញ(ប័ណ្ណព័ត៌មាន) សរុប៤១២,១៣៦ប័ណ្ណ និងបានចែក ជូនលើកទី១សរុបចំនួន៤០០,០០៨ប័ណ្ណ ស្មើរ៩៧,០៦%។ គិតត្រឹមថ្ងៃទី២៣ ខែតុលា ឆ្នាំ២០២១ មានប្រជាពលរដ្ឋប៉ាន់ស្មានអាយុ ១៨ឆ្នាំឡើងសរុប៤៨៨,៩៦១នាក់, ចំនួនប៉ាន់ស្មានចុះឈ្មោះថ្មី សរុបចំនួន៧៦,៨២៥នាក់។ ចំពោះលទ្ធផលនៃការពិនិត្យឈ្មោះ និងចុះឈ្មោះបោះឆ្នោតថ្មី សរុបចាប់ពីថ្ងៃទី១២ ខែតុលា រហូតដល់ថ្ងៃទី២៣ ខែតុលា ឆ្នាំ២០២១ មានប្រជាពលរដ្ឋមកចុះ ឈ្មោះថ្មីចំនួន៦,១៤១នាក់ ស្រីចំនួន៣,១១១នាក់, លុបចេញពីបញ្ជីឈ្មោះបោះឆ្នោត៣,០៥៨នាក់ កែតម្រូវក្នុងបញ្ជីឈ្មោះបោះឆ្នោតសរុប១,៥៧៩នាក់ និងផ្ទេរចេញសរុបចំនួន១,៥២៣នាក់។ លោកបន្ថែមថា ដំណើរការនៃការពិនិត្យឈ្មោះ និងចុះឈ្មោះថ្មីក្នុងបញ្ជីឈ្មោះបោះឆ្នោត សម្រាប់ខេត្តកំពង់ធំ ដំណើរការល្អ! ជួបបញ្ហាបន្តិចបន្ទួច ដោយសារការឆ្លងរីករាលដាលនៃជំងឺផង ចំពេលរដូវភ្លៀងធ្លាក់ធ្វើឲ្យប្រជាពលរដ្ឋពិបាកធ្វើដំណើរមកកាន់ការិយាល័យពិនិត្យ និងចុះឈ្មោះ និងបញ្ហាអ៊ិនធឺនិតខ្លះៗផងដែរ។ ប៉ុន្តែបើទោះបីជាយ៉ាងនេះក្តី ប្រជាពលរដ្ឋមួយចំនួននៅតាមទី ប្រជុំជន មានចំណេះដឹងផ្នែកបច្ចេកវិទ្យាបាន និងកំពុងចូលពិនិត្យឈ្មោះតាម Website (voterlist.nec.gov.kh) ឃើញមានកំហុស និងមកស្នើរសុំកែតម្រូវ។

 ជាមួយគ្នានេះ លោក សូមអំពាវនាវដល់ប្រជាពលរដ្ឋទាំងអស់ដែលគ្រប់អាយុ បោះឆ្នោតសូមបន្តមកពិនិត្យឈ្មោះ និងចុះឈ្មោះថ្មីក្នុងបញ្ជីឈ្មោះបោះឆ្នោតឲ្យបានគ្រប់ៗគ្នា ដើម្បីបំពេញកាតព្វកិច្ចជាពលរដ្ឋល្អ មានសិទ្ធិបោះឆ្នោតជ្រើសរើសតំណាងដែលខ្លួនពេញចិត្ត ដើម្បីអភិវឌ្ឍន៍មូលដ្ឋានរបស់ខ្លួនបន្តទៀត។