ប្រភពគណបក្សចំនួន ២ បានប្រាប់ឲ្យដឹងថា គណបក្សកាន់អំណាចរបស់ប្រទេសអាល្លឺម៉ង់ គឺប្រជាធិបតេយ្យសង្គម (SPD) នៅថ្ងៃចន្ទ (ទី២៥ ខែវិច្ឆិកា) នេះ បានតែងតាំងអធិការបតី លោក Olaf Scholz ផ្លូវការជាបេក្ខជននាំមុខគេ សម្រាប់ការបោះឆ្នោតមុនអាណត្តិ នាពេលខាងមុខ ដោយការសម្រេចនេះបានផ្តល់ឲ្យរូបលោកនូវឱកាសទទួលបានអាណត្តិទី២ បើទោះបីជាកំពុងដឹកនាំរដ្ឋាភិបាលចម្រុះដែលដួលរលំក៏ដោយ។

ការប្រកាសនេះធ្វើឡើងបន្ទាប់ពីរដ្ឋមន្ត្រីការពារជាតិដ៏មានប្រជាប្រិយ គឺលោក Boris Pistorius បានដកខ្លួនចេញពីការឈរឈ្មោះប្រកួតប្រជែងនេះ កាលពីថ្ងៃព្រហស្បតិ៍សប្តាហ៍មុន ដោយបញ្ចប់ការរំពឹងទុកជាច្រើនសប្តាហ៍ ជុំវិញថា តើលោកគួរតែដឹកនាំគណបក្ស SPD នៅក្នុងការបោះឆ្នោតជំនួសលោក Scholz ដែរ ឬយ៉ាងណា។

ប្រភពពីគណបក្សបាននិយាយថា គណៈកម្មាធិការប្រតិបត្តិរបស់គណបក្ស SPD បានបោះឆ្នោតជាឯកច្ឆន្ទឲ្យលោក Scholz ជាបេក្ខជនអធិការបតី។

លោក Scholz ជាអធិការបតីដែលមានប្រជាប្រិយភាពតិចបំផុត នៅប្រទេសអាឡឺម៉ង់ គិតចាប់តាំងពីការបង្រួបបង្រួម ក្នុងឆ្នាំ១៩៩០ មានយុទ្ធនាការដ៏ធំក្រៃលែង នៅចំពោះមុខលោក ប្រសិនបើលោកចង់ឈ្នះការបោះឆ្នោតដែលរំពឹងថា នឹងប្រព្រឹត្តទៅនៅថ្ងៃទី២៣ ខែកុម្ភៈ។

គណបក្ស SPD របស់លោក បច្ចុប្បន្នកំពុងស្ថិតនៅចំណាត់ថ្នាក់ទី៣ ក្នុងការស្ទង់មតិ។ ការស្ទង់មតិមួយ ដោយស្ថាប័នស្ទង់មតិ INSA ដែលបានចេញផ្សាយកាលពីថ្ងៃសៅរ៍ចុងសប្ដាហ៍កន្លងមក បានបង្ហាញថា គណបក្សនេះ មានសំឡេងគាំទ្រ ១៤ភាគរយ នៅពីក្រោយក្រុមប្រឆាំងអភិរក្សនិយម ដែលទទួលបានសំឡេង ៣២ភាគរយ និងក្រុមស្ដាំនិយមជ្រុល គឺគណបក្សជាម្រើសផ្សេងទៀតសម្រាប់អាល្លឺម៉ង់ (AfD) ដែលមាន ១៩ភាគរយ៕