អាជ្ញាធរ នៅថ្ងៃចន្ទ (ទី២៥ ខែវិច្ឆិកា) នេះ បានប្រាប់ឲ្យដឹងថា ឆ្មាំល្បាតឆ្នេររបស់ប្រទេសក្រិក បានរកឃើញសពជនអន្តោប្រវេសន៍ចំនួន ៨នាក់ ជាអនីតិជន ៦នាក់ និងស្ត្រី ២នាក់ ដែលបានលង់ទឹកស្លាប់ នៅម្ដុំកោះ Samos ក្នុងសមុទ្រ Aegean។

ជាមួយគ្នានេះ ឆ្មាំល្បាតឆ្នេរបាននិយាយថា នគរបាលក្រិកបានរកឃើញមនុស្ស ៣៦នាក់ទៀត នៅមានជីវិត នៅភាគខាងជើងនៃកោះ Samos ខណៈមនុស្ស ៣នាក់ដែលជាប់នៅតំបន់ថ្មលើកោះនោះ ត្រូវបានជួយសង្គ្រោះដោយមន្ត្រីឆ្មាំល្បាតឆ្នេរ។ ឆ្មាំល្បាតឆ្នេរ បានបន្ថែមថា យន្តហោះ និងនាវា បានជួយប្រតិបត្តិការរុករក និងជួយសង្គ្រោះ។

ហើយយោងតាមមន្ត្រីឆ្មាំល្បាតឆ្នេរដដែល បានឲ្យដឹងទៀតថា អាជ្ញាធរត្រូវបានជូនដំណឹងអំពីឧបទ្ទវហេតុនេះ ដោយអង្គការក្រៅរដ្ឋាភិបាលមួយ ហើយបានប៉ាន់ស្មានថា មានមនុស្សប្រហែល ៥០នាក់ នៅលើនាវាដែលបានដឹកពួកគេមក នៅម្ដុំកោះ Samos នេះ។

គួរបញ្ជាក់ថា ប្រទេសក្រិក ដែលស្ថិតនៅជ្រុងភាគអាគ្នេយ៍របស់សហភាពអឺរ៉ុប គឺជាច្រកផ្លូវដ៏ពេញនិយមមួយជាយូរអង្វែងមកហើយ សម្រាប់ការធ្វើដំណើរទៅកាន់អឺរ៉ុបរបស់ជនអន្តោប្រវេសន៍ និងជនភៀសខ្លួនមកពីតំបន់មជ្ឈិមបូព៌ា អាហ្វ្រិក និងអាស៊ី៕