បាល់ទាត់៖ ក្រុមបាល់ទាត់កោះកុងអេហ្វស៊ីបានក្លាយជាជើងឯកពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ឆ្នាំ២០២១ បន្ទាប់ពីយកឈ្នះក្រុមមន្ទីរអប់រំ យុវជន និងកីឡាខេត្តត្បូងឃ្មុំដោយលទ្ធផល ៣-០ ក្នុងជំនួបវគ្គផ្ដាច់ព្រ័ត្រនៅកីឡដ្ឋានខេមបូឌាអ៊ែរវ៉េកាលពីចុងសប្ដាហ៍កន្លងទៅ។
ការប្រកួតនេះ ក្រុមកោះកុងអេហ្វស៊ីបានបំប៉ោងសំណាញ់ទីក្រុមជើងឯករងឆ្នាំចាស់ខេត្តត្បូងឃ្មុំ ១គ្រាប់មុនទាំងលំបាកនៅវគ្គទី១ ដែលធ្វើសម្រេចដោយកីឡាករ ប៉ែន បញ្ញាវឌ្ឍ នៅនាទី៣៧។ ប៉ុន្ដែចូលវគ្គទី២ បន្ទាប់ពីលេងបានជាង ១០នាទី ត្បូងឃ្មុំបានបាត់បង់សមាជិកម្នាក់គឺកីឡាករ លី រមី ក្រោយរងពិន័យកាតលឿង ២ដងស្មើនឹងកាតក្រហម ដែលធ្វើឲ្យក្រុមលោក ហុក សុជីវ័ន មានប្រៀប និងបានដាក់សម្ពាធរហូតរកបាន ២គ្រាប់បន្ថែមដោយកីឡាករ ជៀន វិសាល នៅនាទី៨១ និងកីឡាករ ពៅ ភារិទ្ធ នៅនាទី៩០+៤។ ជ័យជម្នះនេះបានធ្វើឲ្យក្រុមកោះកុងអេហ្វស៊ីបើកទំព័រប្រវត្តិសាស្ដ្រលើកពានសម្ដេចតេជោ ហ៊ុន សែន-ថ្នាក់ខេត្តលើកដំបូង ស្របពេលខេត្តត្បូងឃ្មុំបានត្រឹមជើងឯករង ២ឆ្នាំជាប់គ្នាសម្រាប់រដូវកាលឆ្នាំ២០២០ និងឆ្នាំ២០២១ នេះ បន្ទាប់ពីពួកគេធ្លាប់គ្រងជើងឯកពានថ្នាក់ខេត្តលើកដំបូង កាលពីឆ្នាំ២០១៩ កន្លងទៅ។
ចំពោះរង្វាន់ជ័យលាភីពានរង្វាន់ថ្នាក់ខេត្តឆ្នាំនេះ ក្រុមជើងឯកកោះកុងអេហ្វស៊ីទទួលពាន និងមេដាយមាស អមប្រាក់រង្វាន់ ១៥លានរៀល ខណៈក្រុមលេខ២ ខេត្តត្បូងឃ្មុំទទួលបានមេដាយប្រាក់ និងប្រាក់រង្វាន់ ៧លាន ៥សែនរៀល និងក្រុមលេខ៣ ខេត្តបន្ទាយមានជ័យទទួលបានមេដាយសំរឹទ្ធ អមប្រាក់រង្វាន់ ៥លានរៀល មុនក្រុមទាំងពីរដឹកដៃគ្នាទៅលេងពានសម្ដេចតេជោ ហ៊ុន សែន-ថ្នាក់ជាតិ នាពេលឆាប់ៗខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
