ក្រុមមន្ត្រី និងគណបក្សរបស់អតីតនាយករដ្ឋមន្ត្រីប៉ាគីស្ថាន លោក Imran Khan បាននិយាយថា យ៉ាងហោចណាស់មន្ត្រីនគរបាលម្នាក់បានស្លាប់ និងរាប់សិបនាក់រងរបួសនៅប្រទេសប៉ាគីស្ថាន ខណៈក្រុមអ្នកគាំទ្រអតីតនាយករដ្ឋមន្ត្រី ដែលកំពុងជាប់ពន្ធនាគារ បានប៉ះទង្គិចគ្នាជាមួយកងកម្លាំងសន្តិសុខនៅខាងក្រៅរដ្ឋធានី Islamabad កាលពីថ្ងៃចន្ទដើមសប្ដាហ៍នេះ។

ក្រុមអាជ្ញាធរបានអនុវត្តការបិទខ្ទប់ទីក្រុងដើម្បីរក្សាសន្តិសុខរយៈពេលពីរថ្ងៃចុងក្រោយនេះ បន្ទាប់ពីលោក Khan បានអំពាវនាវឲ្យមានការហែក្បួននៅសភាសម្រាប់ការតវ៉ាអង្គុយទាមទារឲ្យដោះលែងរូបលោក ខណៈផ្លូវហាយវ៉េនានាក្នុងទីក្រុងត្រូវបានបិទ។

ស្នងការនគរបាលខេត្ត លោក អ៊ូស្មាន់ អាន់វ៉ា(Usman Anwar) បាននិយាយថា មន្ត្រីនគរបាលម្នាក់បានស្លាប់ និងយ៉ាងហោចណាស់ ១១៩ នាក់ផ្សេងទៀតបានរងរបួស ហើយរថយន្តនគរបាល ២២ គ្រឿងត្រូវបានដុតបំផ្លាញក្នុងការប៉ះទង្គិចគ្នានៅខាងក្រៅទីក្រុង Islamabad និងកន្លែងផ្សេងទៀតក្នុងខេត្ត Punjab ។ លោកបន្តថា មន្ត្រីពីរនាក់ស្ថិតក្នុងស្ថានភាពធ្ងន់ធ្ងរ។

គណបក្សរបស់លោក Khan បាននិយាយថា បុគ្គលិករបស់ខ្លួនជាច្រើននាក់ក៏បានរងរបួសផងដែរ។

គណបក្សខាងលើបាននិយាយថាភរិយាទីបីរបស់មេដឹកនាំជាប់ពន្ធនាគារគឺលោកស្រី Bushra Bibi និងមន្ត្រីជំនិតដ៏សំខាន់គឺ លោក Ali Amin Gandapur ដែលជារដ្ឋមន្រ្ដីប្រចាំខេត្ត ខៃប៊ ផាកទុងខ្វា (Khyber Pakhtunkhwa) កំពុងដឹកនាំការហែក្បួនដែលបានទៅដល់ជិតខាងក្នុងទីក្រុង Islamabad កាលពីយប់ថ្ងៃចន្ទ៕