ក្រុមឧទ្ទាមជនជាតិភាគតិចមីយ៉ាន់ម៉ា ដ៏ធំមួយបាននិយាយកាលពីថ្ងៃចន្ទ (២៥ វិច្ឆិកា) ថា ខ្លួនបានត្រៀមរួចជាស្រេចសម្រាប់កិច្ចពិភាក្សាជាមួយរដ្ឋាភិបាលរបបសឹកដើម្បីបញ្ចប់ការប្រយុទ្ធជាថ្មីរយៈពេលជាងមួយឆ្នាំ ដែលបានបំផ្លិចបំផ្លាញតំបន់នានានៅតាមព្រំដែនប្រទេសចិន។

កងទ័ពរំដោះជាតិ តាអាង (TNLA) មួយនេះគឺជាក្រុមឧទ្ទាមដ៏មានឥទ្ធិពល ដែលអាចហៅអ្នកប្រយុទ្ធប្រមាណ ៧.០០០នាក់ និងបានប្រយុទ្ធជាមួយយោធាមីយ៉ាន់ម៉ាអស់ពេលជាងមួយទសវត្សរ៍ ដើម្បីស្វ័យភាពសម្រាប់ជនជាតិភាគតិច ប៉ាលួង (Palaung) នៅភាគខាងជើងរដ្ឋសាន (Shan)។

ក្រុម TNLA បាននិយាយនៅលើបណ្ដាញតេលេក្រាមរបស់ខ្លួនថា "យើងប្រកាសថាយើងត្រៀមខ្លួនជាស្រេចដើម្បីជួប និងពិភាក្សាគ្នា ដើម្បីបញ្ចប់ជម្លោះយោធាពីភាគីទាំងពីរ"។ ខណៈលើកឡើងពីការត្រៀមខ្លួនសម្រាប់កិច្ចសន្ទនា ក្រុមឧទ្ទាមនេះក៏សង្កត់ធ្ងន់ថាខ្លួននឹងរក្សា "សិទ្ធិក្នុងការការពារខ្លួនផងដែរ"។

របបយោធាដែលកំពុងប្រយុទ្ធរបស់សហភាពមីយ៉ាន់ម៉ា នៅក្នុងខែកញ្ញា បានចេញការអញ្ជើញដែលមិនធ្លាប់មានពីមុនមក ដល់សត្រូវរបស់ខ្លួនដើម្បីចាប់ផ្តើមកិច្ចចរចា ប៉ុន្តែត្រូវបានច្រានចោលនៅពេលនោះដោយបណ្ដាក្រុមឧទ្ទាម។

ក្រុមអ្នកវិភាគនិយាយថា ទីក្រុងប៉េកាំង បានដាក់សម្ពាធលើកងទ័ព TNLA និងសម្ព័ន្ធមិត្តរបស់ខ្លួន គឺកងទ័ពសម្ព័ន្ធប្រជាធិបតេយ្យជាតិមីយ៉ាន់ម៉ា (MNDAA) ឱ្យបញ្ឈប់ប្រតិបត្តិការរបស់ពួកគេប្រឆាំងនឹងរបបយោធា ដែលទំនងជាឈានដល់ការយល់ព្រមចរចានេះ៕