​បាល់ទាត់៖ កីឡាករ​ក្រុម​ជម្រើស​ជាតិ​កម្ពុជា ៦​រូប​រួមមាន គួច សុ​កុម្ភៈ​, សឿ​យ វិសាល​, ចាន់ វឌ្ឍនាកា​, សារ៉េត គ្រី​យ៉ា​, កែវ សុខ​សិលា និង អ៊ា​ន ពិសី បាន​ធ្វើ​ដំណើរ​មកដល់​មាតុភូមិ​វិញដោយ​សុវត្ថិភាព​ហើយ​កាលពី​ល្ងាច​ថ្ងៃ​ទី​២៤ ខែ​តុលា ឆ្នាំ​២០២១ បន្ទាប់ពី​សម្រាក​ព្យាបាល និង​ជាសះស្បើយ​ពី​ជំងឺ​កូ​វីដ​-១៩ ជា​បន្ដបន្ទាប់នៅ​ប្រទេស​បា​រ៉ែ​នកាលពី​ថ្មីៗ។​

​បន្ទាប់ពី​ធ្វើដំណើរ​មកដល់​មាតុភូមិ​ភ្លាម កីឡាករ​ទាំង ៦​រូបបាន​បន្ដដំណើរ​ទៅ​មជ្ឈមណ្ឌល​សាលា​បាល់ទាត់​ជាតិ​បាទី ដើម្បី​ធ្វើ​ច​ត្ដា​ឡី​ស័ក​រយៈពេល ៣​ថ្ងៃ​ទៀតទើប​អនុញ្ញាត​ឲ្យ​ទៅផ្ទះ និង​ក្លិប​រៀងៗ​ខ្លួន​វិញ។ នេះ​បើតាម​ការបញ្ជាក់​របស់​ប្រធាន​ក្រុម​គោព្រៃ​កម្ពុជា និង​ក្លិប​ព្រះខ័ន​រាជ​ស្វាយរៀង សឿ​យ វិសាល។​ ​សូមបញ្ជាក់ថា កីឡាករ​ជម្រើសជាតិ​កម្ពុជា​ទាំង ៦​រូបបាន​រកឃើញ​វិជ្ជមាន​កូ​វីដ​-១៩ ក្នុងពេល​បំពេញបេសកកម្ម​នៅ​ប្រទេស​បា​រ៉ែ​នក្នុងការ​ប្រកួត​ជម្រុះ Play-Off នៃ​ពានរង្វាន់ AFC Asian Cup China 2023 ជាមួយ​ក្រុម​កោះ​ហ្គាំ។ ក្រោយ​រកឃើញ​វិជ្ជមាន ក្រសួងសុខាភិបាល​បា​រ៉ែ​នបានរៀបចំ​សណ្ឋាគារ​មួយ ដើម្បី​ព្យាបាល​កីឡាករ​កម្ពុជាដោយ​តម្រូវ​ឲ្យ​ធ្វើ​ច​ត្ដា​ឡី​ស័ក និង​សម្រាក​ព្យាបាល​រយៈពេល ១០​ថ្ងៃរហូតដល់​ថ្ងៃទី​២២ ខែតុលា​កន្លងទៅទើប​ធ្វើតេស្ដ PRC អវិជ្ជមាន​ជា​បន្ដបន្ទាប់ និង​អនុញ្ញាត​ឲ្យ​ត្រឡប់មក​មាតុភូមិ​វិញ។​ ​គួរ​ដឹងថា ក្នុង​បេសកកម្ម​នោះដែរ ក្រុម​ជម្រើសជាតិ​កម្ពុជាបាន​យកឈ្នះ​ក្រុម​កោះ​ហ្គាំ​របស់​សហរដ្ឋអាមេរិក​នេះ ទាំង ២​ជើងក្នុង​លទ្ធផល ៣-១ ដើម្បី​ឡើងទៅ​វគ្គ​ជម្រុះ​ជុំ​ទី​៣ នៃ​ពានរង្វាន់ AFC Asian Cup China 2023៕

​អត្ថបទ៖ លី ឈុន​ឡា