អឺរ៉ុបខាងកើត៖ យោងតាមសារព័ត៌មាន Reuters ចំនួនករណីឆ្លងវីរុសកូរ៉ូណាសរុបជាង ២០លាននាក់ត្រូវបានកត់ត្រានៅក្នុងប្លុកអឺរ៉ុបខាងកើតកាលពីថ្ងៃអាទិត្យ ខណៈតំបន់នេះប្រឹងប្រែងទប់ទល់នឹងការផ្ទុះរាលដាលដ៏ធ្ងន់ធ្ងរបំផុត ចាប់តាំងពីវីរុសរាតត្បាតសកលបានចាប់ផ្ដើម និងដំណើរការចាក់វ៉ាក់សាំងយឺតយ៉ាវ។ បណ្ដាប្រទេសមួយចំនួននៅក្នុងតំបន់មានអត្រាចាក់វ៉ាក់សាំងទាបបំផុតនៅក្នុងប៉ែកអឺរ៉ុប ដោយមានតិចជាងពាក់កណ្ដាលនៃចំនួនប្រជាជនបានទទួលវ៉ាក់សាំងតែមួយដូស។
យោងតាមអង្គការតាមដានទិន្នន័យឆ្លង និងស្លាប់ដោយសារវីរុស COVID-19 Our World in Data ប្រទេសហុងគ្រីមានអត្រាចាក់វ៉ាក់សាំងបានខ្ពស់ជាងគេដល់ទៅ ៦២% នៃចំនួនប្រជាពលរដ្ឋរបស់ខ្លួនដែលបានទទួលយ៉ាងហោចណាស់មួយដូស ចំណែកអ៊ុយក្រែនវិញមានអត្រាចាក់វ៉ាក់សាំងត្រឹមតែ ១៩% នៃចំនួនប្រជាជនដែលទទួលបានត្រឹមដូសទី១។ របាយការណ៍របស់សារព័ត៌មាន Reuters កាលពីថ្ងៃសុក្របានបង្ហាញថា ករណីឆ្លងថ្មីនៅក្នុងតំបន់បានកើនឡើងជាបន្តបន្ទាប់ ហើយពេលនេះករណីឆ្លងជាមធ្យមមានជាង ៨៣,៧០០នាក់ ក្នុងមួយថ្ងៃ ជាកម្រិតខ្ពស់បំផុតចាប់តាំងពីខែវិច្ឆិកាឆ្នាំមុន។
ទោះបីជាវាមានត្រឹមតែ ៤% នៃចំនួនប្រជាជនពិភពលោកក៏ដោយ អឺរ៉ុបខាងកើតមានចំនួនប្រហែល ២០% នៃករណីឆ្លងថ្មីទាំងអស់ដែលត្រូវបានរាយការណ៍នៅទូទាំងពិភពលោក។ យោងតាមការវិភាគរបស់សារព័ត៌មាន Reuters ប្រទេស៣ ក្នុងចំណោមប្រទេសរងគ្រោះខ្លាំងបំផុតចំនួន៥ ដែលកំពុងរាយការណ៍ពីចំនួនអ្នកស្លាប់ខ្ពស់បំផុតនៅក្នុងពិភពលោក គឺនៅអឺរ៉ុបខាងកើតមានដូចជាប្រទេសរុស្ស៊ី, អ៊ុយក្រែន និងរ៉ូម៉ានី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
