ភ្នាក់ងារចារកម្មរបស់ប្រទេសអ៊ុយក្រែន ដែលបានពិនិត្យមើលកម្ទេចកម្ទីនៃសព្វាវុធប្រើប្រាស់ក្នុងការវាយប្រហារតាមអាកាសរបស់រុស្ស៊ី រកឃើញថា បំណែកខ្លះមកពីមីស៊ីលបាលីស្ទីក ត្រូវបានផលិតនៅក្នុងប្រទេសកូរ៉េខាងជើង។

បំណែកទាំងនេះ រួមមានទាំងគ្រឿងមួយចំនួនត្រូវបានផលិតនៅក្នុងប្រទេសផ្សេងៗទៀត ដែលនាំឱ្យពួកគេចោទប្រកាន់ប្រទេសកូរ៉េខាងជើងថា ធ្វើការជាមួយរុស្ស៊ី និងអ៊ីរ៉ង់ ដើម្បីបញ្ចៀសការដាក់ទណ្ឌកម្មអន្តរជាតិ។

ទីភ្នាក់ងារស៊ើបការណ៍សម្ងាត់របស់ក្រសួងការពារជាតិ បាននិយាយនៅលើបណ្តាញផ្សព្វផ្សាយសង្គមកាលពីថ្ងៃចន្ទថា គ្រឿងផ្គុំជាច្រើនត្រូវបានផលិតដោយក្រុមហ៊ុននៅក្នុងប្រទេសជប៉ុន ចិន សហរដ្ឋអាមេរិក ចក្រភពអង់គ្លេស និងប្រទេសស្វីស។

វាត្រូវបានគេរកឃើញនៅក្នុងប្រភេទមីស៊ីលរបស់កូរ៉េខាងជើងចំនួនពីរប្រភេទ ដែលគេស្គាល់ថា KN23 និង KN24។ 

យ៉ាងហោចណាស់គ្រឿងបន្លាស់មួយប្រភេទត្រូវបានផលិតនៅក្នុងចក្រភពអង់គ្លេសកាលពីឆ្នាំមុន បន្ទាប់ពីការវាយលុក ចាប់ផ្តើម។

ក្រុមមន្ត្រី និយាយថា រុស្ស៊ីបានទទួលមីស៊ីលបែបនេះច្រើនជាង១០០គ្រាប់ពីប្រទេសកូរ៉េខាងជើង។