​បាល់ទាត់៖ លោក Ryu Hirose គ្រូ​បង្វឹក​ក្រុម​ជម្រើស​ជាតិ​អាយុ​ក្រោម ២៣​ឆ្នាំ​កម្ពុជា​បាន​លើក​ឡើង​ថា ការផ្លាស់ប្ដូរ​កីឡាករ​ចុងក្រោយ​នៅ​ចុង​ម៉ោងក្នុងជំនួប​បើកឆាក​ពូ​ល K នៃ​វគ្គ​ជម្រុះ​ពានរង្វាន់ AFC U23 Asian Cup 2022 ជាមួយ​ក្រុម U23 ហុងកុងគឺជា​យុទ្ធសាស្ដ្រ​ត្រៀម​ប៉ះ​ក្រុម​ម្ចាស់ផ្ទះ U23 ជប៉ុននា​ព្រឹក​ថ្ងៃទី​២៦ ខែតុលា​ស្អែក​នេះ។​

​ការលើកឡើង​របស់​គ្រូបង្វឹក​ជនជាតិ​ជប៉ុន​រូបនេះ ក្រោយ​ក្រុម U23 ហុងកុងវាយបក​បាន ២​គ្រាប់​វិញនៅ​ចុង​ម៉ោង បន្ទាប់ពី​ក្រុម​គោព្រៃ​ជំទង់​កម្ពុជាបើក​ការ​នាំមុខ ៤​គ្រាប់​មុនក្នុងជំនួប​នៅ​កីឡដ្ឋាន J-Village ប្រទេស​ជប៉ុនកាលពី​ចុង​សប្ដាហ៍​កន្លងទៅ។ ​ការប្រកួត​ដំបូង​ក្នុង​ពូ​ល K នេះក្រុម U23 កម្ពុជាបានបង្ហាញ​ទម្រង់​លេង​យ៉ាង​ល្អដោយ​អាច​បំប៉ោង​សំណាញ់​ទីក្រុង U23 ហុងកុង ៤​គ្រាប់​មុនដោយ​កីឡាករ សៀង ច​ន្ធា ២​គ្រាប់នៅ​នាទី​៤០ និង​នាទី​៥៤ មុន​កីឡាករ ស៊ិន កក្កដា និង មិន រតនៈ បន្ថែម​ម្នាក់ ១​គ្រាប់​ទៀតនៅ​នាទី​៥៦ និង​នាទី​៦១។​ ​ដំណាលគ្នា​នឹង​ការធ្វើ​បានល្អ​នេះ លោក Ryu Hirose បាន​ផ្លាស់ប្ដូរ​កីឡាករ​មួយចំនួន តែ​ការប្ដូរ​ចូល​នោះពុំបាន​ធ្វើ​ឲ្យ​ទម្រង់​លេង​ល្អប្រសើរ​នោះទេ ផ្ទុយទៅវិញត្រូវបាន​ក្រុម U23 ហុងកុងមានឱកាស​វាយបក ២​គ្រាប់​វិញដោយ​កីឡាករ Lam Lok Kan Jordan នៅ​នាទី​៨១ និង​នាទី​៩០+៣ មុន​អាជ្ញាកណ្ដាល​ផ្លុំ​កញ្ចែ​បញ្ចប់​ការប្រកួត។​

​លោក Ryu Hirose បាន​បញ្ជាក់ថា ជ័យជម្នះ​នេះផ្ដើមចេញពី​ការព្យាយាម​រក្សា​បាល់ ដូច​អ្វីដែល​ក្រុម U23 កម្ពុជា​បាន​អនុវត្ត​ក្នុងពេល​ហ្វឹកហាត់។ ប៉ុន្ដែ​ការ​របូត ២​គ្រាប់នៅ​ចុង​វគ្គ​ទី​២ បណ្ដាលមកពី​ការផ្លាស់ប្ដូរ​កីឡាករ​ច្រើន ព្រោះ​លោក​ចង់ដឹង​ពី​ការលេង​របស់​កីឡាករ​ថ្មីៗ​ខ្លះ តែ​ការផ្លាស់ប្ដូរ​នេះអាច​ឲ្យ​លោក​ដឹងថា កម្ពុជា​ត្រូវ​កែសម្រួល​បែបណាសម្រាប់​ជំនួប​បញ្ច​ប់ពូ​លជាមួយ​ក្រុម U23 ជប៉ុន។​ ​គួរ​ដឹងថា ក្រុម U23 កម្ពុជានឹងត្រូវ​ជួប​ក្រុម​ម្ចាស់ផ្ទះ U23 ជប៉ុននា​វេលា​ម៉ោង ១១​ព្រឹកថ្ងៃទី​២៦ ខែតុលា​ស្អែក​នេះនៅ​កីឡដ្ឋាន J-Village ដដែលដែលជា​ការប្រកួត​ដ៏​សំខាន់ ដោយ​ក្រុម​គោព្រៃ​ជំទង់​កម្ពុជាត្រូវការ​យ៉ាងហោច ១​ពិន្ទុដើម្បី​រក្សា​ឱកាស​ប្រជែង​កៅអី​វគ្គ ១៦​ក្រុម​ចុងក្រោយនៃ​ពានរង្វាន់ AFC U23 Asian Cup 2022 នៅ​ប្រទេស​អូ​បេ​គី​ស្ថាន៕

​អត្ថបទ៖ លី ឈុន​ឡា