អាជ្ញាធរតំបន់សមុទ្រក្រហម បាននិយាយកាលពីថ្ងៃចន្ទថា មនុស្ស២៨នាក់ ត្រូវបានជួយសង្គ្រោះ បន្ទាប់ពីទូកទេសចរណ៍មួយគ្រឿង បានលិចនៅឆ្នេរសមុទ្រក្រហមរបស់ប្រទេសអេហ្ស៊ីប។ ក្រុមអ្នកជួយសង្គ្រោះ បានបន្តស្វែងរកអ្នកដំណើរ និងសមាជិកនាវិកចំនួន ១៧ នាក់ ដែលនៅបាត់ខ្លួន។

ទូកដែលមានឈ្មោះថា Sea Story កំពុងដឹកមនុស្ស៤៥នាក់ រួមមានអ្នកទេសចរ៣១នាក់ មានសញ្ជាតិផ្សេងៗគ្នា និងអ្នកបម្រើការលើទូក១៤នាក់ នៅពេលទូកបានលិចនៅជិតទីក្រុងឆ្នេរ Marsa Alam ។

សមុទ្រក្រហម មានភាពល្បីល្បាញដោយសារថ្មប៉ប្រះទឹកផ្កាថ្ម និងសត្វសមុទ្រ។ អាជ្ញាធរ និយាយថា អ្នកទេសចរទាំងនោះ កំពុងធ្វើដំណើរទៅមុជក្នុងជម្រៅទឹករយៈពេលច្រើនថ្ងៃ។

ទូកដឹកភ្ញៀវទេសចរ បានចាកចេញពីកំពង់ផែ Porto Ghalib ក្នុងទីក្រុង Marsa Alam កាលពីថ្ងៃអាទិត្យ ហើយគ្រោងនឹងត្រឡប់ទៅតំបន់ Hurghada Marina នៅថ្ងៃសុក្រ។ អភិបាលតំបន់សមុទ្រក្រហម លោក Amr Hanafi បាននិយាយថា ការហៅទូរស័ព្ទ ត្រូវបានទទួលនៅម៉ោង៥ និង៣០នាទីព្រឹកម៉ោងក្នុងតំបន់។ កងនាវានិងយន្តហោះរបស់កងកម្លាំងប្រដាប់អាវុធអេហ្ស៊ីប បានព្យាយាមស្វែងរកអ្នកដែលនៅបាត់ខ្លួន។ វាជាទូកទីពីរដែលបានលិចនៅតំបន់នេះ ក្នុងឆ្នាំនេះ។