អាជ្ញាធរនៅរដ្ឋ Western Australia ប្រទេសអូស្រាលី នៅថ្ងៃអង្គារនេះ បានចេញបញ្ជាឱ្យប្រជាជននៃសហគមន៍ចំនួនពីរ ជម្លៀសខ្លួនចេញ ដោយសារតែចំហេះព្រៃកំពុងគំរាមកំហែងដល់អាយុជីវិតអ្នកដែលរស់នៅក្បែរនោះ។

អង្គភាពពន្លត់អគ្គិភ័យ និងអង្គភាពសេវាសង្គ្រោះបន្ទាន់នៅនៅរដ្ឋ Western Australia បានចេញការប្រកាសអាសន្នចំហេះព្រៃ នៅព្រឹកថ្ងៃអង្គារនេះសម្រាប់សហគមន៍ Cooljarloo និង សហគមន៍ Wedge Island ដែលមានចម្ងាយប្រហែល១៥០គីឡូម៉ែត្រ ភាគខាងជើងទីក្រុង ភឺស(Perth) ដោយណែនាំអ្នកស្រុកឱ្យ ចាកចេញជាបន្ទាន់។

ក្នុងការប្រកាសអាសន្នបាននិយាយថា «អ្នកស្ថិតក្នុងគ្រោះថ្នាក់ ត្រូវភៀសខ្លួនចេញភ្លាមៗដើម្បីសង្គ្រោះជីវិត»។ «មានការគំរាមកំហែងដល់អាយុជីវិត និងលំនៅឋាន»។

សេចក្តីប្រកាស បានបញ្ជាឱ្យអ្នកស្រុកចាកចេញពីទិសដៅភាគខាងជើង ទៅកាន់ទីកន្លែងមានសុវត្ថិភាពជាងនេះ។

ចំហេះព្រៃ ត្រូវបានរាយការណ៍ជាលើកដំបូងកាលពីព្រឹកថ្ងៃចន្ទ ហើយនៅតែពុំទាន់អាចគ្រប់គ្រងបាន។ ផ្លូវជាច្រើនខ្សែនៅក្នុងតំបន់នេះ ត្រូវបានបិទ ហើយមជ្ឈមណ្ឌលជម្លៀសមួយ ត្រូវបានបើកនៅក្នុង ក្រុងJurien Bay ភាគខាងជើងនៃសហគមន៍ទាំងពីរ។