ស្របពេលប្រទេសកម្ពុជាបានកំពុងដំណើរការកិច្ចប្រជុំកំពូលសេដ្ឋកិច្ច និងបច្ចេកវិទ្យាចិនសកល ឆ្នាំ​២០២៤ (GCET Summit 2024)។ មន្រ្តីជាន់ខ្ពស់នៃរាជរដ្ឋាភិបាលកម្ពុជា សង្ឃឹមទុកថា អ្នក​វិនិយោគ​ទុន​ថ្មីៗបន្ថែមទៀត អាចនឹងងាកមកស្វែងយល់សេដ្ឋកិច្ចទីផ្សារ និងស្វែងរកទីផ្សារ​កាលា​នុវត្តភាព​នៅ​កម្ពុជា ខណៈសហរដ្ឋអារមេរិកបានប្រកាសអំពីគម្រោងដំឡើងពន្ធនាំចូល។

ឯកឧត្ដមបណ្ឌិត សុក ស៊ីផាន់ណា ទេសរដ្ឋមន្ត្រីនៃរាជរដ្ឋាភិបាលកម្ពុជា ប្រធានក្រុមប្រឹក្សា ប្រឹក្សា​គោល​នយោបាយពាណិជ្ជកម្ម និងជាប្រធានគណៈកម្មាធិការរៀបចំកម្ពុជា បានមា​ន​ប្រសាសន៍​ប្រាប់​បណ្តាញ​អ្នកសារព័ត៌មាន នៅរសៀលថ្ងៃទី២៦ ខែវិច្ឆិកានេះថា ក្នុងបរិបទដែល​ប្រធានា​ធិបតី​អាមេរិក​ថ្មី ឯកឧត្ដម ដូ ណាត្រាំ នឹងចូលកាន់តំណែង នៅថ្ងៃទី២០ ខែមករា ឆ្នាំ​២០២៥​ខាង​មុខ​នេះ នឹងជំរុញឱ្យមានការដំឡើងពន្ធគយក្នុងការនាំចូលលើបណ្ដាប្រទេសមួយចំនួន ដែល​នឹងធ្វើឱ្យប៉ះពាល់យ៉ាងខ្លាំងទៅលើសេដ្ឋកិច្ចពិភពលោក។ ឯកឧត្ដម បានបន្តថា ដោយ​មើល​ឃើញ​កត្ដា​នេះ រាជរដ្ឋាភិបាលត្រៀមលក្ខណៈ និងកត្ដាពិសេសជាច្រើន ដើម្បីតម្រង់ទិស​សេដ្ឋកិច្ច​របស់​ខ្លួន​ឱ្យស្រ​បតាមប្រទេសក្នុងតំបន់ និងពិភពលោក។

ឯកឧត្ដម ទេសរដ្ឋមន្រ្តី បានលើកឡើងបន្តថា ទោះបីជាកម្ពុជាជាប្រទេសតូច ប៉ុន្តែមានទីផ្សារធំ ដែល​ជាឱកាសរបស់ កម្ពុជាក្នុងការទាក់ទាញអ្នកវិនិយោគិនជាច្រើន ដើម្បី​មក​បណ្ដាក់​ទុន​រក​ស៊ី​នៅ​កម្ពុជា​កាន់​តែ​ច្រើន។ ឯកឧត្ដមបន្ថែមថា កត្ដាសំខាន់របស់​រាជ​រដ្ឋាភិបាល​កម្ពុជា​ក្នុង​ការ​ទាក់​ទាញ​វិនិយោគ​គិន​បរទេសនេះ គឺរក្សាសន្ដិភាព ស្ថិរភាពនយោបាយ ការបើកចំហរសេដ្ឋកិច្ច ការ​លើក​ទឹក​ចិត្ដ និងទាញអ្នកវិនិយោគមកទស្សនកិច្ច និងស្វែងយល់​ពីទិដ្ឋភាព​ជាក់​ស្ដែង​នៅ​ក្នុង​ប្រទេស​កម្ពុជា​ឱ្យបានច្រើន។

នៅក្នុងពិធីបើកប្រជុំកំពូលសេដ្ឋកិច្ច និងបច្ចេកវិទ្យាចិនសកល ឆ្នាំ២០២៤ កាលពីព្រឹកនេះ សម្តេច​នាយករដ្ឋមន្ត្រី ហ៊ុន ម៉ាណែត បានថ្លែងថា កម្ពុជាបានផ្ដល់ភាពជាម្ចាស់អាជីវកម្មបរទេស ១០០% ដោយមិនមានការរឹតបណ្ដឹងលើប្រាស់ចំណេញ និងការផ្ញើ​ដើមទុនត្រឡប់ទៅវិញនោះទេ ដែលនេះជាចំណុចខុសគ្នាជាមួយប្រទេសមួយចំនួននៅក្នុងតំបន់ តាមរយៈ​ការ​អនុញ្ញាត​ឱ្យ​អ្នក​វិនិយោគ​រក្សា​ប្រាក់ចំណេញរបស់វិនិយោគិនកាន់តែច្រើន ដើម្បីក្លាយជា​គោល​ដៅ​ដែល​មាន​ភាព​ប្រកួ​ត​ប្រជែងសម្រាប់វិនិយោគ។

សម្តេចធិបតី បានបញ្ជាក់ថា រាជរដ្ឋាភិបាលកម្ពុជាមានការលើកទឹកចិត្ដកម្រិតខ្ពស់ ដែលមាន​ភាព​ទន់​ភ្លន់​ខ្លាំងនៅក្នុងតំបន់ ដែលត្រូវបានរចនាឡើង ដើម្បីជួយអាជីវកម្ម និងការ​វិនិយោគ​ឱ្យ​មាន​ការ​រីក​ចម្រើន។ នៅពេលអាជីវកម្មវិនិយោគក្នុងឧស្សាហកម្មបច្ចេកវិទ្យា និងកម្មន្ដសាល កម្ពុជា​ត្រូវ​ផ្ដល់​នូវ​អត្ថប្រយោជន៍មានការរីកចម្រើនបន្ថែមយ៉ាងច្រើនសម្បើម ដើម្បីជួយ​ឱ្យ​អាជីវកម្ម​របស់​អ្នក​បណ្តាក់​ទុន​វិនិយោគមានការរីកចម្រើនផងដែរ៕ អត្ថបទ ឈិត បូរ៉ាវី