ទីភ្នាក់ងារសារព័ត៌មាន WAFA របស់ប៉ាឡេស្ទីនបានរាយការណ៍ ដោយដកស្រង់សម្តីរដ្ឋបាលនៃដែនដីនេះថា៖«គ្រូពេទ្យ និងគិលានុបដ្ឋាកជាង១.000 នាក់ ត្រូវបានសម្លាប់ នៅក្នុងប្រតិបត្តិការយោធារបស់អ៊ីស្រាអែល នៅតំបន់ហ្កាហ្សា ចាប់តាំងពីជម្លោះអ៊ីស្រាអែល និងប៉ាឡេស្ទីន បានផ្ទុះឡើង នៅក្នុងខែតុលា ឆ្នាំ ២០២៣»។

យោងតាមសេចក្តីថ្លែងការណ៍របស់រដ្ឋបាលដែលត្រូវបានដកស្រង់ដោយ WAFA បានឲ្យដឹងថា បុគ្គលិក  សុខាភិបាលជាង ៣១០នាក់ នៅក្នុងដែនដីនេះ ត្រូវបានចាប់ខ្លួន ធ្វើទារុណកម្ម និងប្រហារជីវិត នៅក្នុងពន្ធនាគារ។ សេចក្តីថ្លែងការណ៍ បានបន្ថែមទៀតថា៖«លើសពីនេះ កងទ័ពអ៊ីស្រាអែលហាមឃាត់ការនាំចូលថ្នាំ ទៅកាន់តំបន់ហ្កាហ្សាស្ទ្រីប និងរារាំងការចុះសួរសុខទុក្ខរបស់គណៈប្រតិភូពេទ្យ និងវេជ្ជបណ្ឌិត។ មន្ទីរពេទ្យ នៅតែជាគោលដៅសម្រាប់កងទ័ពអ៊ីស្រាអែល ដែលទម្លាក់គ្រាប់បែក ឡោមព័ទ្ធ និងវាយលុកពួកគេ ដោយបានសម្លាប់ និងបង្កឲ្យរបួសគ្រូពេទ្យ និងគិលានុបដ្ឋាកយ៉ាងច្រើន។ 

WAFA ចង្អុលបង្ហាញថា ចំនួនអ្នកស្លាប់ពីការឈ្លានពានរបស់អ៊ីស្រាអែល បានកើនឡើងដល់ ៤៤.២១១ នាក់ ចាប់តាំងពីថ្ងៃទី ០៧ ខែតុលា ឆ្នាំ ២០២៣ ខណៈដែលមនុស្ស ១០៤.៥៦៧នាក់ផ្សេងទៀត បានរងរបួស។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ា នៅថ្ងៃទី 0៧ ខែតុលា ឆ្នាំ ២០២៣ នៅពេលដែលក្រុមយុទ្ធជនមកពីចលនាបដិវត្តន៍ប៉ាឡេស្ទីនហាម៉ាសដែលមានមូលដ្ឋាននៅតំបន់ហ្កាហ្សាស្ទ្រីប បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែលពីតំបន់ហ្កាហ្សា ដោយបានសម្លាប់អ្នកស្រុករស់នៅតាមព្រំដែនអ៊ីស្រាអែល និងចាប់ចំណាប់ថ្នូរជាច្រើននាក់។ ជាការឆ្លើយតប អ៊ីស្រាអែលបានបើកប្រតិបត្តិការយោធា នៅក្នុងដែនដីប៉ាឡេស្ទីន ដើម្បីកម្ទេចក្រុមយោធា និងសមាជិកនយោបាយរបស់ក្រុមហាម៉ាស និងដោះលែងចំណាប់ថ្នូរទាំងអស់។