លោក Dmitry Gendelman ទីប្រឹក្សាការិយាល័យនាយករដ្ឋមន្ត្រី បានប្រាប់សារព័ត៌មាន TASSថា នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូន (Benjamin Netanyahu) បានកោះប្រជុំគណៈរដ្ឋមន្ត្រីសន្តិសុខរបស់ប្រទេសនេះសម្រាប់កិច្ចប្រជុំមួយ ដែលគ្រោងធ្វើឡើង នៅរសៀលថ្ងៃទី ២៦ ខែវិច្ឆិកា ស្របពេលមានរបាយការណ៍អំពីវឌ្ឍនភាពនៃកិច្ចចរចាបទឈប់បាញ់ នៅប្រទេសលីបង់។ 

លោកបានថ្លែងក្នុងការឆ្លើយតបនឹងសំណួរដែលពាក់ព័ន្ធគ្នាថា៖«កិច្ចប្រជុំគណៈរដ្ឋមន្ត្រីសន្តិសុខ ត្រូវបានគ្រោងធ្វើ នៅថ្ងៃទី ២៦ ខែវិច្ឆិកានេះ។ ទោះជាយ៉ាងណាក៏ដោយ លោក Gendelman បានបញ្ជាក់       ថា៖«របៀបវារៈនៃកិច្ចប្រជុំ នឹងត្រូវបានប្រកាស នៅពេលក្រោយ»។

មុននេះ អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby បាននិយាយនៅក្នុងសន្និសីទ មួយថា អ៊ីស្រាអែល និងលីបង់ ឥឡូវនេះជិតឈានដល់កិច្ចព្រមព្រៀងឈប់បាញ់ ដែលនឹងរួមបញ្ចូលការរៀបចំជាមួយក្រុមហេសបូឡា Shia ។ យោងតាមប្រភពសារព័ត៌មាន Al Nahar បានឲ្យដឹងថា ប្រធានាធិបតីអាមេរិក ចូ បៃដិន (Joe Biden) និងសមភាគីបារាំង និងលោក អេម៉ានុយអែល ម៉ាក្រុង (Emmanuel Macron) អាចនឹងចេញសេចក្តីថ្លែងការណ៍ស្តីពីកិច្ចព្រមព្រៀង នៅព្រឹកថ្ងៃអង្គារនេះ បន្ទាប់ពីរដ្ឋាភិបាលអ៊ីស្រាអែល បានអនុម័តសេចក្តីព្រាងកិច្ចព្រមព្រៀង នៅក្នុងកិច្ចប្រជុំរបស់ខ្លួននោះ។