អង្គភាពចារកម្មការពារជាតិអ៊ុយក្រែន បាននិយាយថា ប្រទេសកូរ៉េខាងជើង បានផ្គត់ផ្គង់មីស៊ីលបាលីស្ទីក KN-23 និង KN-24 ជាង ១០០គ្រាប់ ហើយបានបញ្ជូនអ្នកឯកទេសយោធា ទៅកាន់ប្រទេសរុស្ស៊ី ដើម្បីគាំទ្រសង្រ្គាមរបស់ខ្លួន ជាមួយអ៊ុយក្រែន។

ការផ្គត់ផ្គង់នេះ គឺជាសញ្ញាមួយផ្សេងទៀតនៃកិច្ចសហប្រតិបត្តិការយោធាដ៏ស៊ីជម្រៅរបស់កូរ៉េខាងជើង និងរុស្ស៊ី ដែលបានចូលរួមផងដែរក្នុងការដាក់ពង្រាយទាហានកូរ៉េខាងជើងជាង១០.000នាក់ ទៅកាន់ប្រទេសរុស្ស៊ី។

ទីភ្នាក់ងារស៊ើបការណ៍សម្ងាត់ការពារជាតិអ៊ុយក្រែន បាននិយាយនៅក្នុងរបាយការណ៍មួយថា៖«រដ្ឋរុស្ស៊ីដែលជាអ្នកឈ្លានពាន បានទទួលមីស៊ីលប្រភេទនេះជាង ១០០គ្រាប់ ពីប្រទេសកូរ៉េខាងជើង។ សត្រូវនេះ បានប្រើអាវុធទាំងនេះជាលើកដំបូង នៅក្នុងសង្គ្រាមប្រឆាំងនឹងអ៊ុយក្រែន នៅចុងឆ្នាំ ២០២៣។ 

ស្ថាប័ននេះ បាននិយាយថា៖«រួមជាមួយមីស៊ីលទាំងនេះ ទីក្រុងព្យុងយ៉ាង បានបញ្ជូនអ្នកឯកទេសយោធារបស់ខ្លួន ទៅកាន់ប្រទេសរុស្ស៊ី ដើម្បីបាញ់បង្ហោះ និងចូលរួមក្នុងឧក្រិដ្ឋកម្មសង្គ្រាមប្រឆាំងនឹងអ៊ុយ      ក្រែន» ។

មីស៊ីល KN-23 និង KN-24 គឺជាមីស៊ីលបាលីស្ទីករយៈចម្ងាយខ្លីរបស់កូរ៉េខាងជើង ដែលមានសមត្ថភាពផ្ទុកក្បាលគ្រាប់នុយក្លេអ៊ែរ ដែលគេស្គាល់ថា ជាប្រភេទ Hwasong-11។

អង្គភាពស៊ើបការណ៍នេះ បាននិយាយថា មីស៊ីលដែលបណ្តាលឲ្យជនស៊ីវិលស្លាប់បាត់បង់ជីវិតជាច្រើន ត្រូវបានរកឃើញថា មានធាតុផ្សំដែលផលិតដោយក្រុមហ៊ុនបរទេស រួមទាំងពីចក្រភពអង់គ្លេស ចិន ជប៉ុន ស្វ៊ីស និងសហរដ្ឋអាមេរិក។