សហភាពអឺរ៉ុប (EU) កាលពីថ្ងៃច័ន្ទ បានច្រានចោលរបាយការណ៍ស្តីពីការនាំចូលឧស្ម័នរបស់ខ្លួនពីប្រទេសរុស្ស៊ី តាមរយៈប្រទេសអាស៊ែបៃហ្សង់ ដោយនិយាយថាប្រទេសអាស៊ែបៃហ្សង់ នឹងមិនបន្តការនាំចេញឧស្ម័នរុស្ស៊ីទៅកាន់សហភាពអឺរ៉ុបនោះទេ ហើយកិច្ចព្រមព្រៀងថាមពលដែលមានជាបន្តបន្ទាប់ជាមួយប្រទេសអាសែបៃហ្សង់ គឺមិនបង្កើតច្រកខាងក្រោយសម្រាប់ឧស្ម័នរុស្ស៊ីបន្ថែមទៀត ដើម្បីទៅដល់ទ្វីបនេះឡើយ។

លោក Tim McPhie អ្នកនាំពាក្យសម្រាប់សកម្មភាពអាកាសធាតុ និងថាមពល នៅគណៈកម្មការអឺរ៉ុប បាននិយាយថា ការនាំចូលឧស្ម័នរុស្ស៊ីរបស់ប្រទេសអាសែបៃហ្សង់ គឺសម្រាប់ការប្រើប្រាស់ក្នុងស្រុកតែប៉ុណ្ណោះ ពុំមែនសម្រាប់ការបន្តនាំចេញទៅកាន់សហភាពអឺរ៉ុបនោះទេ ដោយបានច្រានចោលការចោទប្រកាន់ណាមួយ អំពីការនាំចូលឧស្ម័នរុស្ស៊ី របស់សហភាពអឺរ៉ុប តាមរយៈប្រទេសតំបន់សោស៏កូកាស (South Caucasus) មួយនេះ។

ជាផ្នែកមួយនៃកិច្ចខិតខំប្រឹងប្រែងរបស់សហភាពអឺរ៉ុប ដើម្បីបញ្ចប់ការពឹងផ្អែកលើប្រទេសរុស្ស៊ី ប្រធានគណៈកម្មការអឺរ៉ុប លោកស្រី Ursula von der Leyen បានចុះហត្ថលេខាលើកិច្ចព្រមព្រៀងដ៏សំខាន់មួយ ជាមួយប្រធានាធិបតីអាសែបៃហ្សង់ លោក Ilham Aliyev ក្នុងឆ្នាំ២០២២ ដែលត្រូវបានរៀបចំ ដើម្បីបង្កើនទ្វេរដងការនាំចូលរបស់ប្លុកនេះពីប្រទេសអាសែបៃហ្សង់ នៅឆ្នាំ២០២៧។ ចាប់តាំងពីពេលនោះមក រុស្ស៊ី និងអាសែបៃហ្សង់ ក៏បាន បានចុះកិច្ចព្រមព្រៀងបញ្ជូនឧស្ម័នជាបន្តបន្ទាប់។

យោងតាមសារព័ត៌មាន Politico របស់សហរដ្ឋអាមេរិកបានឲ្យដឹងថា អាស៊ែបៃហ្សង់ បានបង្កើនការនាំចូលឥន្ធនៈហ្វូស៊ីលរបស់ខ្លួនពីប្រទេសរុស្ស៊ីយ៉ាងច្រើន ដើម្បីជំរុញការនាំចេញទៅកាន់អឺរ៉ុប។ 

វិទ្យាស្ថានភូមិន្ទនៃកិច្ចការអន្តរជាតិ របស់ចក្រភពអង់គ្លេស ធ្លាប់បានអះអាងថា ឧស្ម័នរុស្ស៊ីកំពុងត្រូវបានបញ្ជូនទៅកាន់អឺរ៉ុប តាមរយៈប្រទេសអាសែបៃហ្សង់និងទួរគី ដើម្បីបំពេញតម្រូវការខ្ពស់ ដែលនៅបន្តរបស់អឺរ៉ុប។

ក្នុងការឆ្លើយតប លោក McPhie បាននិយាយថា ព័ត៌មានរបស់សហភាពអឺរ៉ុប បង្ហាញថាប្រទេសអាសែបៃហ្សង់ នាំចូលឧស្ម័នរុស្ស៊ីតិចជាងមួយពាន់លានម៉ែត្រគូបក្នុងមួយឆ្នាំ ដែលត្រូវបានប្រើប្រាស់សម្រាប់តែគោលបំណងក្នុងស្រុកប៉ុណ្ណោះ។

យោងតាមសារព័ត៌មាន Politico បានរាយការណ៍ថា អាស៊ែបៃហ្សង់ បានលក់ឧស្ម័នប្រហែល១០ពាន់លានម៉ែត្រគូបទៅឱ្យអឺរ៉ុបនៅឆ្នាំនេះ។