សារព័ត៌មាន Yonhap របស់កូរ៉េខាងត្បូង បានរាយការណ៍ដោយដកស្រង់សម្តីយោធាថា អាជ្ញាធរកូរ៉េខាងជើង កំពុងរុះរើខ្សែបញ្ជូនថាមពល ដែលតភ្ជាប់ទៅដល់តំបន់ឧស្សាហកម្ម Kaesong ដែលបច្ចុប្បន្ន ត្រូវបានបិទ នៅលើទឹកដីរបស់ប្រទេសនេះ។

យោងតាមទីភ្នាក់ងារសារព័ត៌មាន ទាហាននៃកងទ័ពប្រជាជនកូរ៉េ បាននឹងកំពុងរុះរើខ្សែថាមពល នៅផ្នែកខ្លះនៅចន្លោះប៉មបញ្ជូនចរន្តអគ្គិសនី ស្ថិតតាមបណ្តោយផ្លូវរថភ្លើង Gyeongui ចាប់តាំងពីថ្ងៃអាទិត្យ។ ទាហានកូរ៉េខាងត្បូង។ ទាហានកូរ៉េខាងត្បូង ប៉ាន់ស្មានថា ខ្សែបញ្ជូនថាមពល ដែលឈប់ដំណើរការ តាំងពីខែមិថុនា ឆ្នាំ ២០២០ នៅពេលដែលការផ្គត់ផ្គង់ថាមពល ត្រូវបានកាត់ផ្តាច់ បន្ទាប់ពីការបំផ្ទុះគ្រាប់បែកនៃការិយាល័យទំនាក់ទំនងអន្តរកូរ៉េ នៅតំបន់ Kaesong ក៏នឹងត្រូវរុះរើ ក្នុងពេលឆាប់ៗនេះដែរ។

ទីភ្នាក់ងារព័ត៌មាននេះ បានចង្អុលបង្ហាញថា ខ្សែបណ្តាញអគ្គិសនី ត្រូវបានសាងសង់ដោយភាគីកូរ៉េខាងត្បូង។ ប៉មបញ្ជូនចរន្តអគ្គិសនី ៤៨ ត្រូវបានដំឡើង ដើម្បីផ្គត់ផ្គង់អគ្គិសនីដល់បរិវេណឧស្សាហកម្ម ដែលក្នុងនោះ ១៥ មានទីតាំង នៅក្នុងទឹកដីកូរ៉េខាងជើង។ តំបន់ឧស្សាហកម្មនេះ ត្រូវបានបិទ នៅក្នុងឆ្នាំ    ២០១៦ ។

កាលពីថ្ងៃទី ១៥ ខែតុលា ឆ្នាំ ២០២៤ កូរ៉េខាងជើងបានបំផ្ទុះផ្លូវដែក និងផ្លូវ ដែលតភ្ជាប់ទៅដល់កូរ៉េខាងត្បូង។ ក្រុងព្យុងយ៉ាង បាននិយាយថា ខ្លួនគ្រោងនឹង «ប្រែក្លាយព្រំដែនខាងត្បូងឲ្យទៅជាបន្ទាយ»។ មេដឹកនាំកូរ៉េខាងជើង លោក គីម ជុងអ៊ុន បានសង្កត់ធ្ងន់ថា ការបំផ្ទុះផ្លូវមិនត្រឹមតែជានិមិត្តរូបនៃការបញ្ឈប់ទំនាក់ទំនងផ្លូវគោកប៉ុណ្ណោះទេ ប៉ុន្តែក៏ជាការបដិសេធនូវគំនិតនៃការបង្រួបបង្រួមឧបទ្វីបកូរ៉េផងដែរ។