ទេសរដ្ឋមន្ត្រីសិង្ហបុរី លោក Lee Hsien Loong បានចូលជួបប្រធានាធិបតីចិន លោក ស៊ី ជីនពីង (Xi Jinping) នៅទីក្រុងប៉េកាំង នាថ្ងៃអង្គារ (ទី២៦ វិច្ឆិកា) នេះ។

ឥស្សរជនទាំង២ បានជជែកគ្នាពីកិច្ចការផ្សេងៗតិចតួច នៅពេលដើរចូលទៅក្នុងវិមាន Diaoyutai ដោយលោកទេសរដ្ឋមន្ត្រី Lee បានប្រាប់ថា លោកបានជិះរថភ្លើងល្បឿនលឿនពីទីក្រុង Suzhou ទៅកាន់រដ្ឋធានីប៉េកាំង ដែលចំណាយពេល ៤ម៉ោង។ លោក Lee បាននិយាយជាភាសាចិនកុកងឺទៅកាន់លោក ស៊ី ដែលកំពុងញញឹម នៅពេលដែលអង្គុយទល់មុខគ្នាថា «មានផាសុកភាព និងងាយស្រួលណាស់»។

ចំណែកលោក ស៊ី បាននិយាយថា លោកសប្បាយចិត្តដែលបានជួបលោក Lee ម្តងទៀត។ លោកប្រធានាធិបតីបានបញ្ជាក់ថា៖ «ក្នុងករណីណាក៏ដោយ យើងធ្លាប់ជួបជាញឹកញាប់កាលពីអតីតកាល»។ ហើយជាមួយគ្នានេះ លោក ស៊ី ក៏បានស្វាគមន៍លោក Lee ក្នុងតួនាទីថ្មីរបស់លោកជាទេសរដ្ឋមន្ត្រីផងដែរ។ លោក ស៊ី បានថ្លែងបន្ថែមទៀតថា៖ «ទាំងនៅកម្រិតអន្តរជាតិ និងអាស៊ី អ្នកត្រូវបានចាត់ទុកថា ជាអ្នកនយោបាយចាស់វស្សាមួយរូប»។

គួរបញ្ជាក់ថា លោកទេសរដ្ឋមន្ត្រី Lee បានចាប់ផ្តើមទស្សនកិច្ចរបស់លោក នៅប្រទេសចិន ក្នុងទីក្រុង Suzhou នៃខេត្ត Jiangsu ជាកន្លែងដែលលោកបានធ្វើជាអធិបតីក្នុងព្រឹត្តិការណ៍រំលឹកខួបលើកទី៣០ នៃគម្រោងអភិវឌ្ឍន៍សួនឧស្សាហកម្ម Suzhou (SIP) របស់រដ្ឋាភិបាល និងរដ្ឋាភិបាល។ ដំណើរនេះបានកើតឡើងភ្លាមៗ បន្ទាប់ពីដំណើរទស្សនកិច្ចការងាររបស់លោកទៅកាន់ទីក្រុង Boston និង New York នៅសហរដ្ឋអាមេរិក ដែលទើបតែបានបញ្ចប់ការបោះឆ្នោតប្រធានាធិបតី ដែលលោក Donald Trump បានជាប់ឆ្នោតឡើងវិញ៕