រដ្ឋមន្រ្តីការបរទេសលីបង់លោក Abdallah Bou Habib បាននិយាយថា លោកសង្ឃឹមថា បទឈប់បាញ់ ដើម្បីបញ្ចប់សង្រ្គាមរវាងអ៊ីស្រាអែល និងក្រុមប្រដាប់អាវុធហេសបូឡាលីបង់ នឹងត្រូវឈានដល់នៅយប់ថ្ងៃអង្គារនេះ ។

ថ្លែងទៅកាន់កិច្ចប្រជុំកំពូលប្រទេសមានឧស្សាហកម្មរីកលូតលាស់ G7នៅក្នុងប្រទេសអ៊ីតាលី លោក Abdallah និយាយថា កងទ័ពលីបង់នឹងត្រៀមខ្លួនដើម្បីដាក់ពង្រាយទាហានយ៉ាងហោច ៥ពាន់នាក់ ទៅកាន់តំបន់ភាគខាងត្បូងលីបង់ ពេលដែលទាហានអ៊ីស្រាអែលដកចេញវិញ ហើយលោកសង្ឃឹមថា សហរដ្ឋអាមេរិកអាចដើរតួយ៉ាងសំខាន់ក្នុងការកសាងឡើងវិញហេដ្ឋារចនាសម្ព័ន្ធដែលត្រូវបានបំផ្លិចបំផ្លាញដោយសារការវាយប្រហាររបស់អ៊ីស្រាអែល ។

លោកបានថ្លែងបែបនេះ ស្របពេលដែលមន្រ្តីជាន់ខ្ពស់អ៊ីស្រាអែលមួយរូបនិយាយថា អ៊ីស្រាអែលគ្រោងនឹងយល់ព្រមលើផែនការរបស់សហរដ្ឋអាមេរិកសម្រាប់បទឈប់បាញ់ជាមួយក្រុមហេសបូឡានៅថ្ងៃអង្គារនេះ ។

កិច្ចព្រមព្រៀងនេះ នឹងត្រួសត្រាយផ្លូវសម្រាប់បញ្ចប់ជម្លោះដែលបានសម្លាប់មនុស្សរាប់ពាន់នាក់ ចាប់តាំងពីសង្រ្គាមផ្ទុះឡើងដោយសារវិវាទនៅតំបន់ហ្កាហ្សា កាលពីរយៈពេល ១៤ខែមុន ។

គណៈរដ្ឋមន្រ្តីសន្តិសុខអ៊ីស្រាអែល ត្រូវបានគេរំពឹងថា នឹងកោះប្រជុំនៅថ្ងៃអង្គារនេះ ដើម្បីពិភាក្សាលើសំណើបទឈប់បាញ់ ហើយទំនងជាយល់ព្រមនៅក្នុងជំនួបដែលរៀបចំឡើងដោយនាយករដ្ឋមន្រ្តីអ៊ីស្រាអែលលោក Benjamin Netanyahu ៕