ពលរដ្ឋជម្លៀសចេញពីទីក្រុងភាគខាងជើង Metula របស់អ៊ីស្រាអែល នៅជាប់ព្រំដែនលីបង់ និយាយនៅថ្ងៃអង្គារនេះថា ពួកគេមានការព្រួយបារម្ភចំពោះកិច្ចព្រមព្រៀងបទឈប់បាញ់ស្នើសុំជាមួយក្រុមហេសបូឡាថានឹងមិនផ្តល់សន្តិសុខយូរអង្វែងនោះទេ ។

លោក Kobi Katz និងភរិយា Orit ដែលរស់នៅក្នុងទីក្រុង Metula អស់រយៈពេលជាង ៥០ឆ្នាំមកហើយនោះ បានជម្លៀសខ្លួនចេញពីផ្ទះសម្បែងរបស់ពួកគេកាលពីរយៈពេល ១ឆ្នាំមុន ពេលដែលក្រុមហេសបូឡា ចាប់ផ្តើមផ្លោងគ្រាប់រ៉ុក្កែត និងមីស៊ីលលើអ៊ីស្រាអែល ក្រោយសម្ព័ន្ធមិត្តហាម៉ាស់របស់ពួកគេ វាយប្រហារអ៊ីស្រាអែលកាលពីថ្ងៃទី ៧ ខែតុលា ឆ្នាំ ២០២៣ ។

លោក Katz និយាយថា លោកមិនបានដឹងថាកិច្ចព្រមព្រៀងនេះនិយាយពីអ្វីឲ្យលម្អិតនោះទេ ដែលអ៊ីស្រាអែល គ្រោងនឹងយល់ព្រមនៅថ្ងៃអង្គារនេះ ។ លោកថា ពួកយើងគ្មានអារម្មណ៍សុវត្ថិភាពនោះទេ ។

លោក Katz និងភរិយារបស់លោក បានស្នាក់នៅក្នុងសណ្ឋាគារស្ថិតក្នុងទីក្រុង Haif ជាទីដែលអ្នកស្រុកផ្សេងទៀតនៅតំបន់ភាគខាងជើងអ៊ីស្រាអែល បានជ្រកកោន អំឡុងពេលសង្រ្គាម ។

កងកម្លាំងអ៊ីស្រាអែល បានបង្កើនការវាយប្រហាររបស់ពួកគេលើគោលដៅរបស់ក្រុមហេសបូឡា ដើម្បីធានាថា ពលរដ្ឋអ៊ីស្រាអែលជម្លៀសខ្លួនជាង ៦ម៉ឺននាក់ នឹងអាចវិលត្រឡប់ទៅកាន់ផ្ទះសម្បែងរបស់ពួកគេវិញដោយសុវត្ថិភាពនៅភាគខាងជើងប្រទេស ។

ក្រុមហេសបូឡា បានផ្លោងមីស៊ីលជាង ១៦.០០០គ្រាប់លើអ៊ីស្រាអែល ខណៈដែលការវាយប្រហារតាមច្រកអាកាសទ្រង់ទ្រាយធំរបស់អ៊ីស្រាអែល និងការវាយប្រហារតាមជើងគោក បានបណ្តាលឲ្យពលរដ្ឋលីបង់ ១លាននាក់ រត់ភៀសខ្លួនចេញពីផ្ទះសម្បែងរបស់ពួកគេ ៕