ជនប៉ាឡេស្ទីនជម្លៀសខ្លួននៅទីក្រុងភាគខាងត្បូង Khan Younis បាននិយាយរៀបរាប់ពីស្ថានភាពរស់នៅដ៏លំបាករបស់ពួកគេនៅក្នុងជំរំសំពត់តង់ជ្រកកោនបណ្តោះអាសន្ន អំឡុងរដូវត្រជាក់ ក្នុងស្ថានភាពរងាខ្លាំង និងកង្វះខាតស្បៀងអាហារ សម្រាប់គ្រួសារពួកគេ ។

អ្នកស្រី Umm Loay Asfour គឺជាជនប៉ាឡេស្ទីនមួយរូបនៅក្នុងទីក្រុង Khan Younis និយាយថា រាល់យប់កូនៗរបស់គាត់ស្រែកថ្ងូរដោយសារតែរងា និងការស្រេកឃ្លានអាហារ ។ កូនៗរបស់គាត់ចូលដេក ពុំបានទទួលទានអាហារពេលល្ងាចនោះទេ ។

ពេលដែលភ្លៀងធ្លាក់ខ្លាំង បានជន់លិចសំពត់តង់របស់ពួកគេ ជនប៉ាឡេស្ទីន ត្រូវបានគេមើលឃើញព្យាយាមធ្វើឲ្យសំពត់តង់របស់ពួកគេមានសុវត្ថិភាពជាមួយនឹងការយកថង់ប្លាស្ទិកទៅគ្រប់បិទបាំង ជម្រករបស់ពួកគេ ។

លោក Mohammed Abu Karsh គឺជាជនប៉ាឡេស្ទីនមួយរូបទៀតរស់នៅក្នុងជំរំជ្រកកោនក្នុងទីក្រុង Khan Younis និយាយថា ពួកយើងរស់នៅកន្លែងដែលគ្មានជញ្ជាំងនោះទេ ។ ពួកយើងបានយកភួយគ្រប ។ ភួយមិនអាចការពារបានអ្វីនោះទេ ពិសេសនៅពេលមានភ្លៀងធ្លាក់ខ្លាំងបែបនេះ ។

រយៈពេល ១៣ខែចូលក្នុងយុទ្ធនាការសឹកដ៏ខ្ទេចខ្ទាំរបស់អ៊ីស្រាអែលនៅតំបន់ហ្កាហ្សាជាការឆ្លើយតបនឹងការវាយប្រហារស្លាប់មនុស្សរបស់ក្រុមហាម៉ាស់កាលពីថ្ងៃទី ៧ ខែតុលា ឆ្នាំ ២០២៣ កង្វះខាតស្បៀងអាហារធ្ងន់ធ្ងរ ឱសថ និងទំនិញផ្សេងទៀត បណ្តាលឲ្យមានការស្រេកឃ្លានទ្រង់ទ្រាយធំ ហើយនិងការឈឺចាប់នៅក្នុងចំណោមជនស៊ីវិល ។

យុទ្ធនាការរបស់អ៊ីស្រាអែលនេះដែរ បានសម្លាប់មនុស្សជាង ៤៤.២០០នាក់ និងស្ទើតែធ្វើឲ្យរលាយពលរដ្ឋនៅតំបន់ហ្កាហ្សា ក្នុងពេលតែមួយ ខណៈដែលធ្វើឲ្យតំបន់បិទច្រកមួយនេះ ក្លាយជាគំនរបាក់បែក ៕